Barca tan UCL champion a theih loh - Messi

Barcelona thiampuipa Lionel Messi chuan Quique Setien hnuaia an khelh dan ang chuan Champions League-ah nomawi a chawi theih loh thu a sawi.

Kum 32 mi Messi chuan, "Kan squad-ah hian rinhlelhna ka nei lo a, kan inkhelh hmabak La Liga leh Champions League-ah pawh kan chak vek theih ka ring. Amaherawhchu tuna kan khelh dan chuan ka beisei lo.

"Mitinin ngaihdan an nei a, a zahawm vek. Kei chuan kum tina Champions League champion ṭhin aṭangin ngaihdan ka siam. Tuna kan khelh ang hi chuan Champions League-ah a champion theih loh," tiin a ngaihdan tlang takin a sawi.

Argentina captain Messi chuan Barcelona hi Champions League-a an champion theih loh thu a sawi tawh a, manager manager Setien-a'n a ṭawmpui lo. Tun ṭumah erawh Messi-a'n chiang takin a ngaihdan a sawi a, Setien-a khelhtir dan chu champion-na khawpah a ngai lo.

Covid-19 vangin La Liga chawlh mek a ni a, June thlaah inelna ṭan tumin hma an la mek. Match 27 khelh tawhah Barcelona hian point 58 hmuin hmahruaitu an ni mek a, amaherawhchu an hnuai chiaha awm Real Madrid-in point 56 an hmu tawh. Champions League-ah Barca hian Last 16 lut tawhin Napoli nen first leg-ah 1-1 in an inhnehtawk a, Nou Camp-ah second leg khelh tur a la awm.

Chawlh laia hun hman dan sawi zuiin Barcelona captain Messi chuan, "In lamah training ka nei ṭhin a, ka taksa dinhmun pawh a ṭha. Inkhung hi a hrehawm ka ti a, chutihrualin Antonela leh ka fate nen hun duhawm tak kan hmang thei a ni," tiin a sawi.