Djokovic-a’n thil tum a nei sang

Novak Djokovic chuan Grand Slam champion hnem ber nih theih a inring a, world number 1 dinhmun chelh rei ber record siam turin beiseina a neih bawk thu a sawi chhuak.

Serbian tlangval hian major title 17 a la tawh, a chungah hian vawi 19 champion tawh Rafael Nadal leh champion hnem ber Roger Federer (20 titles) te an la awm; player pathum hi inkhel lai vek an la ni.

Kum 32 mi Djokovic chuan, “Ka inringtawk viau, inelna liana champion hnem ber leh world number 1 ni rei ber nih hi chu ka thil tum a ni a, ka tih theih ngei pawh ka ring,” tiin inringtawk takin a sawi.

Swiss star Federer chu world number 1 dinhmun chelh rei ber a ni a, a chung berah chawlh kar 310 a awm, a zawna a awm rei zawng chu kar 237 a ni bawk - a chungnung hle.

Djokovic pawh a nep bik lo, kar 282 chhung number 1 a ni tawh a, a zawna a awm rei zawng erawh kar 122 chauh a ni thung. Covid-19 vangin world ranking an chawl lailawk a, number 1 ni lai Djokovic tan hun ṭha a luangral ang pawhin a sawi theih.