Zaninah Mizoram Fight Night semifinal thawh khatna; NE Olympic, National leh International medalist-te inlan dawn

GIG Motors Mizoram Fight Night semifinal thawh khatna chu zanin dar 8:00 hian Dawrpui Multipurpose Centre-ah neih a ni dawn. Boxer ṭha bik chauh an awm tawh avangin inhnek a hmuhnawm dawn a, Fight Night hi Zonet Rihnim leh Zonet Youtube (members only) ah kaltlangin a en theih ang.

Inelna hi Aizawl District Boxing Association leh Zonet buatsaih a ni a, a hmuna Fight Night en man hi Rs 50, Rs 100 leh Rs 200 te a ni ang. Semifinal thawh hnihna hi February 6, Thawhṭanni zanah neih a ni ang a, final hi February 8, Nilaini zanah neih tur a ni.

A hmuhnawm dawn

Bout hmasa berah 52kg category te an inlan dawn. Army Boys, Assam Regiment Centre-a hun rei tak inzir tawh Fredy Lalchhantluanga a inlan dawn. College Veng rawlthar Fredy hi NE Olympic bronze medalist a ni a, Niawhtlang tlangval Lalzahenpuia hmaah fiahna a hmachhawn ang.

Hmeichhe inelna 51 kg-in a chhunzawm dawn. Mary Kom Academy-a inzir tawh Lalrinchhani Pautu a inlan dawn a, NE Olympic silver medalist ni lai a ni. Boxer tawnhriat nei ṭha Rinchhani hian boxer ṭha chho mek TC Malsawmkimi a hmachhawn dawn. North Vanlaiphai nula hian age level-ah Mizoram aiawhin medal a la fo tawh a ni.

National medalist

LPS Pro Fight champion tawh Laldinmawia'n boxing thiam vangin Indian Navy-ah a lut a, Tuipui tlangval hi national medalist ni tawh a ni.

Dinmawia hi Army Sports Institute-ah training a nei mek a, Farkawn tlangval C. Rualthankhuma nen an inhmachhawn dawn. National medalist Dinmawia hi rinkai zawk a ni a, amaherawhchu round hmasa lamah a chak awlsam bik lo tih hriat a ṭha.

63 kg category semifinal-a inlan tur Lallawmawma hi National Games gold medalist ni lai a ni a, Tuipui tlangval Lawmawma che vel hi hmuhnawm a tling. A khingpui tur Freddy Lalchhanchhuaha hi senior boxer a ni thung a, Serchhip tlangval hian Mizoram pawnah record nei ṭha lo mah se Lawmawma tan chetsual theihna a ni ang.

International medalist

Hmeichhe inelnaa inlan tur an ṭha hlawm hle. India aiawh pawha medal hawn tawh Lalbuatsaihi chuan 60+kg-ah NE Olympic gold medalist Lalthuthlungdiki a hmachhawn dawn.

NE Olympic kal tur zawnaah hian BS-i hi an zinchhuah avangin trial a nang hman lo a, an nghah loh avangin a hrethiam lo. Amaherawhchu BS-i aia kal Lawngtlai nula Lalthuthlungdiki hian gold a la tho a, zaninah a ṭha zawk a hriat ang.

57 kg-a inhmachhawn tur TC Lalremruati leh Lalbiaknii pawh a intum tawk dawn. ITI Veng nula Remruati hi NE Olympic-ah silver medalist a ni a, tleirawl rawn ṭha chho Biaknii hmaah fiahin a awm ang.

A tawp kharna

75+kg hmanga a tawp khar tum a ni a, National Games silver medalist ni lai R. Malsawmtluanga leh Johan Vanlalrema te inhmachhawn tura tih a ni. Lunglei tlangval Mala hi a hnathawhna Army-ah a let a ngaih avangin a inlan thei dawn lo a, Tuirial tlangval Johan-a tan vanneihna a ni ang.

A tawp kharna tur erawh a ṭha viau tawh. LPS Profight champion tawh Lalrinawma (Agoa) leh NE Olympic silver medalist Malsawmkima te an inhmachhawn dawn. National Games hnuhnung berah khan Malsawmkima hi Mizoram aiawha kal a ni a, Agoa nen hian rinkai tur zawk hriatthiam a har hle.