FA Cup 2020-ah Arteta-a Arsenal an champion

Arsenal beiseina mei mit ṭep tawh chhem nung turin Mikel Arteta a rawn lang a, a zuitu chu nomawi. Spanish manager kaihhruaina hnuaiah Gunners chuan Chelsea 2-1 a hnehin a vawi 14 nan FA Cup champion an ni.

Pathianni zan Wembley Stadium-a inkhelah Pierre-Emerick Aubameyang-a'n a thiam thil a lantir. Gunners captain hian Blues winger Christian Pulisic goal khung chu penalty aṭanga sut bakah chakna goal mawi zetin a khung.

FA Cup champion an nih avangin Premier League pariatna Gunners hian season tharah Europa League an khel dawn. Lampard-a enkawl Blues erawh palina an nih avangin Champions League khel turin an tling tawh.

Mikel Arteta leh Frank Lampard ten 3-4-3 formation hmang ve ve in an naute an rem khawm. Chelsea midfielder pawimawh N'Golo Kante dam tawh mah se bench lamah dah a la ni, chhuak tur anga sawi Willian chu squad-ah dah 

a ni lo.

Striker palian Olivier Giroud tlawp turin Christian Pulisic leh Mason Mount an awm, an hnungah ball pass thiam Jorginho leh Mateo Kovacic an ding dun. Keeper manto ber Kepa Arrizabalaga aiah Willy Caballero-a'n si ban a nghak.

Mesut Ozil chu squad-ah telh a ni lo a, captain Aubameyang, Alexandre Lacazette leh Nicolas Pepe ten goal an nawr. Keeper Bernd Leno hliam laia a aiawh zo tak Emiliano Martinez chuan inringtawk takin goal a veng.

Fans awm lo mah se inkhel boruak a nung nghal, wing back Ainsley Maitland-Niles-a cross chu Aubameyang-a'n goal pawna a tauh chhuah hnuah Blues winger Mount chuan hla deuh tak aṭangin keeper Martinez chu hna hautak a siamsak zui ve nghal.

Arsenal hnawl hnu Giroud-a'n box chhunga ball a khen zeuh chu Pulisic-a'n la fuhin, American forward hian chep tak kara hmun insiam chawpin goal ṭha tak a khung - Martinez tan tih theih a awm lo, minute ngana lekah Blues lamin hma an hruai.

Minute 28-naah Auba-a'n chak takin box chhungah ball a lalut a, captain Cesar Azpilicueta-a'n ti tluin penalty a chawi a, yellow card pek a ni bawk. Gabonese striker tan si phurh sut turin harsatna a awm lo, ching takin keeper Caballero a bum.

Second half-ah Blues lamin ball chang tam mah se an hlauhawm thei lo. Counter attack aṭangin Gunners lamin an vaw let ṭhin thung. Minute 67-naah Aubameyang chuan a hmaa ding defender Kurt Zouma chiang taka a bum hnuah cool zetin keeper a chip khum, goal class bik a ni.

Lampard-a naute ṭum fuh loh ni a thleng. Defender pawimawh Azpilicueta chu malpui hliam vangin chawlhlawk hmain lakchhuah a ngai, Spain international hian hliam a tawrh bakah penalty a chawi hman avangin atan final boruak ṭha lo tak a ni.

Second half tir lama goal an nawr nat lai takin Pulisic chu hliam vanga thlak a ngai bawk. Hliam dam hlim Pulisic-a'n chak takin ball a tlanpui a, Gunners box a thlenpui dawnah a malpui a na, na tuar chunga goal shot kha hliam lo ta se a goal loh pawhin a hlauhawm khawp ang.

Goal hnih an chhuah a, 2-1 a an hnufual hnuah Blues vanduai a kaltluang. Midfielder Mateo Kovacic chuan Granit Xhaka nen ball an inchuhna lamah a yellow card pahnihna a hmu a, card pek loh theihna tur niin lang mah se referee Anthony Taylor-a'n a hnawt chhuak.

Lampard-a'n risk a lak a ngai tawh. Azpilicueta leh Pulisic te a thlak hnuah Ross Barkley, Tammy Abraham leh Pedro te a dahlut rual ṭhawt a, substitution a neih a hmang zo. Bench aṭanga lutten danglamna an siam thei lo a, hun tawp dawna hliam Pedro thlak tur pawh an awm lo.

•    Mikel Arteta chu player leh manager ni chunga Arsenal tana FA Cup champion thei hmasa ber a ni.

•    Chelsea hi FA Cup final an khelh hnuhnung 10 zinga pathumah an tlawm, an chak lohna pathumah hian Arsenal an ngam lo.

•    Kum 2002 hnu lamah Gunners hian FA Cup final vawi sarih an lut a, hnehna an chang vek.

•    George Graham (1986-87) hnu lamah Arteta hi Arsenal manager zinga season hmasa bera major trophy chawi leh thei hmasa ber a ni.

•    Kumin final second half bikah khan 'shot on target' pakhat chiah a awm, chu chu Pierre-Emerick Aubameyang goal khungna kha a ni.

•    Pierre-Emerick Aubameyang-a'n 2018 February thla aṭang khan English football a khel ṭan a, goal 70 a khung tawh. Hetih hun chhung hian Premier League player zingah goal a khung hnem ber.

•    American player zingah Christian Pulisic kha FA Cup final-a goal khung hmasa ber a ni.

•    Willy Caballero (kum 38 leh ni 308) kha Chelsea player zingah FA Cup final khel upa ber a ni a, kum 19 leh ni 268-a upa Callum Hudson-Odoi kha Blues tana khel naupang ber a ni thung.

Mikel Arteta-a'n season chawhnu lamah Arsenal a enkawl ṭan chauh a, team talbuai tak kha siamṭha nghal vek thei lo mah se kawng ṭhenkhatah chuan nasa takin hma a sawn pui tih chiang takin a lang. Arteta chuan, "Team enkawl hna ka thawh aṭang khan thlawpna ka dawng ṭha. Arsenal chuan khelh duh dan leh beiseina an nei, chumi tihlawhtling tur chuan theihtawp ka chhuah. Tun hi kan bul ṭanna chauh a la ni a, nomawi hmasa ber hi min thlawptute tan ka hlan.

"FA Cup champion nih hi min lawmpui ve ngei pawh ka ring, league lamah duhthusamin season khar chiah lo mah ila tunah chuan hlim hun a ni," a ti. Spanish manager hian hmasawnna lai tur an la ngah thu a sawi bawk.

Arsenal champion ruala zawhna awm nghal chu Pierre-Emerick Aubameyang an chelh thei ang em, tih a ni. Auba hian semifinal-a Manchester City an hneh ṭumin goal hnih a khung a, final-ah pawh a ze ngai chhuahin an champion theihna chhan a ni. Auba chungchang sawiin Arteta chuan, "Inkhel boruak sang leh pawimawhah chuan player danglam bik kan mamawh, a chhanna chu Aubameyang a ni. Ani ang player kan nei hi ka lawm, a hnathawhte 

avangin a chungah ka lawm takzet. "Tunah hian contract thar chungchangah inbiakna a kal mek, a chunga rinna ka nghahzia leh team tana a pawimawhna pawh a hria. Hmasawn zawnga kan kal a nih chuan kan hnenah hun rei zawk a cham ngei ka ring," a ti.

Premier League goal 22 khungtu Auba hian North London club tan season khat daih chauh contract a nei tawh a, tunah hian inbiakna nei mek mah se inremna an la siam lo. Barcelona leh Inter Milan ten an ngaihven ve reng avangin chelh tur chuan pawisa bakah squad thuam chhah thlenga an tiam a ngai ngei ang.

Arsenal leh Chelsea inkhel thununtu Anthony Taylor thutlukna ṭhenkhatin sawi zui a hlawh a, English referee hi 2017 FA Cup final-a Blues defender Victor Moses lo hnawt chhuak tawhtu a nih avangin sawi a hlawh zual ni pawhin a lang. Minute 14-naah Mateo Kovacic-a'n Granit Xhaka laka a foul vangin yellow card hmasa a hmu. Minute 73-naah player pahnih bawk hian ball an inchuh a, 50-50 niin lang mah se Croatian midfielder hi card pek leh niin khelmual a chhuahsan a ngai.

Chelsea manager Frank Lampard chuan, "Ka naute an dik lohnaah kan ṭan kher an ngai lo, tun ṭuma thil thleng erawh kha chu red card tur a ni lo," a ti. Yellow card hi video assistant referee hmanga sut theih a ni lo a, English manager chuan VAR hman dan chu FA-in ngaihtuah nawn se a duh thu a sawi bawk. Arsenal keeper Emiliano Martinez-a’n box pawn aṭangin ball a man, hamrik a ri si lo! Chelsea lamin freekick hmu turah an inngai a, keeper Martinez hi card pek bawk tur niin a lang. Amaherawhchu, Martinez taksa hi pawn lamah awm mah se a ball manin line a pel lo a, ball hian line a pelh kim loh avangin tihsual a nei lo.

Hun tawp dawn lamah box pawna Pedro ball chang chu winger Pepe-a'n hnung lam aṭangin chiang takin a titlu, mahse hamrik a ri lo. Replay aṭanga a lan danah Blues lamin freekick hmu ngei tura ngaih ni mah se pek an ni lo, an vanduai a kaltluang hle. Lampard chuan, "Hnehna chang turin kan khel ṭha tawk lo, sawisel leh phunna tur lam chu sawi ka tum rih lo. Malpui hliam pahnih leh dar hliam kan nei, season rei leh harsa tak kan hman meka a hmawr kan bawk dan hi duhthusam chu a ni lo," a ti.

English manager hian player thar lalut thei lo chungin Chelsea a enkawl a, league-ah palina niin FA Cup final an luh bakah Champions League last 16 an thleng bawk. Nomawi chawi lo mah se Lampard hnathawh hi a ṭha thawkhat viau, season tharah player thar nen beiseina an nei sang zual khawp ang.