Gunners-in Martinelli an thlung nghet

Gabriel Martinelli chuan Arsenal tan contract thar a ziak, an inremna rei zawng hi chiang taka tarlan a ni lo. Gunners website lama an ziah dan chuan, 'hun rei tak chhung atan' tih a ni.

Brazil international Martinelli hi kum 21 mi chauh a la ni, 2019 khan Brazilian club Ituano aṭangin Arsenal hi a zawm. North London club tan hian inelna hrang hrangah match 111 a khel tling der tawh.

Premier League season kal laiah Gabi hi player hmuhnawm zinga mi a ni a, goal sarih khung tawhin Arsenal chu table chung berah a awmpui mek a, player rinrawl a ni phak.

Arsenal manager Mikel Arteta chuan, "Gabi hi kum 21 mi chauh a la ni, theihna a nei sangin hmasawnna tur pawh tam tak a la nei bawk. Tunah chauh ni loin nakin zel atan pawh kan club tan mi pawimawh a ni ang.

"Training-na hmunah a thawkrim em em a, khelmual chhungah pawh hei hi a chhawmnung zel. Fans lam pawhin a theihna leh taimakna hi an hmuh hmaih lo, an player duh berte zinga mi a ni," tiin a sawi.

Martinelli bakah hian Bukayo Saka leh William Saliba te contract pawh pawhsei tura ruahman mek a ni, anni pahnih pawh hi Arteta hnuaia season duhawm hmang mektu an ni a, an thlung nghet thei a nih chuan chanchin lawmawm a ni ang.

Gunners hian zanin dar 6:00 hian Premier League khel turin Everton an lenchilh dawn. Toffees hian Frank Lampard banin Sean Dyche an la, manager thar kaihhruaina hnuaiah point hmuh ngei an tum dawn.