Arsenal pui theitu an hmelma Spurs

Premier League nomawi inchuh boruak a sang chho hle. February 5, Pathianni zan dar 10:00 hian Tottenham Hotspur-in champion lai Manchester City an mikhual dawn. Tun dinhmunah Spurs hmelma Arsenal-in match khata khel tlem chungin point ngain hma an hruai mek a, Antonio Conte hoten Gunners dinhmun hi an tih ṭhat belh thei ang.

Thla liam ta January 20 mai khan Spurs leh City hi Etihad Stadium-ah an inkhel a, Pep Guardiola hote 4-2 in an chak. Man City hi chak chiang viauin lang mah se halftime-ah Spurs-in 2-0 in hmam an hruai tih hriat a ṭha a, tun ṭuma an inkhelhna tur hi Tottenham stadium a ni bawk.

Cancelo tel lohna

Man City-in January thlaah loan hmangin Joao Cancelo an chhuah a, Pep Guardiola hoten ṭul loah pressure an nei phah dawn. Chutihrualin City hian World Cup hnu lamah chuan Cancelo tel lo hian an khel tam zawk a, Portuguese defender hian hmun pawimawh a chang pha lo.

Spanish manager Pep-a'n goal khung khawl Erling Haaland a dah pawimawh a, Norwegian striker mila an khelh dan a siamrem avangin Cancelo hian a tuar phahah a ngaih theih.

Haaland hian Premier League match riat lekah goal 14 a khung tawh a, tunah match 19 khel tling tawhin goal 25 a khung der tawh. Andy Cole leh Alan Shearer ten Premier League season khatah goal 34 khung tawhin record an siam a, City striker hian harsatna nei loin record a siam mai a rinawm.

Nomawi chu

City tan Haaland-a'n hmun pawimawh a chang a, amaherawhchu Pep-a hote hian Norwegian striker tel loin nomawi an chawi tawh ṭhin. Haaland hi a ropui viau a nih pawhin City hi nomawi a chawipui si loh chuan a hlawhchhamah a ngaih theih ang.

Pep-a hote tan nomawi chawi tur chuan Arsenal pressure an pek ṭhat a pawimawh a, chumi tur chuan Spurs lakah point thum an hlawhchhuah a ṭul dawn.

London club hian Haaland ang thoa goal khung thiam Harry Kane an kawl a, Heung-min Son an kawl bawk. Antonio Conte hoten FA Cup-ah Preston 3-0 in an hneh a, Son-a'n goal hnih a khung bakah player thar Arnaut Danjuma-a'n a khung bawk.

Tun hi Spurs phur lai tak a ni a, City-in champion tura point thum an mamawh ang thoin London club hian Champions League khel tura point thum an mamawh avangin inkhel a hmuhnawm ang.