Pathian ka ring em a ni- Isak

Isaka tih hming awmzia chu, "Hlim taka nui," tihna a ni a, Ningani zan khan Indian Super League-ah Mizo tlangval Isak Vanlalruatfela chu hlim takin a nui - a nui ang chu, goal a khung alawm!

Thingsulthliah tlangval Isaka hian a club khelhna Odisha tan goal a khung bakah assist vawi khat a nei a, khualmualah Chennaiyin nen 2-2 in an inhnehtawk - playoff khelh beiseina an nei zel.

Odisha tan hian Isaka bakah Isaac Vanmalsawma chuan inkhel bul a ṭan a, Lalruatthara leh Paul Ramfangzauva te chu bench aṭangin luhtir an ni bawk.

A hming Isaka

Chennaiyin khelmualah Isaka hian minute 24-naah Diego Mauricio goal khung tur chu a siamsak a, Chennaiyin lam hian Anirudh Thapa hmangin an sut lehnghal.

Goal dang lut loin chawlhlawk hman a ni a, second half ṭan aṭanga minute hnihna lekah Isak-a bawk inlar lehin an goal hnihna a khung. Mahse, hei pawh hi Dutch winger Abdenasser El Khayati chuan Chennaiyin tan a sut.

Isak-a hian team pahnih goal khung hmain goal hmahruai a khungah a inngai a, mahse, referee chuan mak tak maiin a pawm lo - assistant referee-in offside a phar a, mahse, a offside lo!

A tawk têin...

Khup hliam vangin Isak-a'n harsatna tawk ṭhin mah se a hun têah a rah leh ta a, referee tihsual vangin goal hnih khung tur khan goal khat chauh a khung - hero of the match-ah erawh thlan a ni tho.

Aizawl FC forward hlui Isaka chuan, "Pathianin a tawk têin ro min relsakah ka ngai a, goal khat ka khung a, a lawmawm tho alawm," tiin Vanglaini a hrilh a, a inngaitlawm thiam hle.

Isaka hi a khup hliam vangin season laihawlah a chawl a, mahse, player inhliam an tam avangin chawlh la duh mah se kohkir a ni - 100% fit lo chunga bul a ṭan chhan chu mita hmutute kan ni e.

Pathian vang

Isaka chuan, "Pathian ka rinna hi a nasa lutuk a, Chennaiyin lakah khan goal min khungtir ngei kha ka ring nghet bur a ni," a ti a, "Pathian ka rin em avangin ka inringtawk tlat a ni," tiin Vanglaini a hrilh bawk.

MPL8 best forward lo ni tawh Isaka chuan, "Ṭum dang zawng aiin ka thawkrim zual a, ka theihna zawng zawng ka hlan," a ti a, chet ṭhat zel a tum.

Isaka chuan, "Chet ṭhat reng erawh thil harsa a ni a, a theih bik lo mai thei. Mahse, mihring lamin kan tih theih ang chu tih zel ka tum ang," a ti - tawp mai a tum lo.

Rawngbawlna

Isaka hian inkhelh zawha ISL lamin an kawmnaah Bible chang a sawi chhuak a, chu thu chu, "Khawvel zawng zawngah kal ula,thilsiam zawng zawng hnenah chuan Chanchin Ṭha hi hril rawh u. A ringa Baptisma chang chu chhandamin an awm ang a, a ring lo erawh chu thiam loh changin an awm ang," (Marka 16:15, 16) tih a ni.

Mumbai City forward Lallianzuala Chhangte chuan, "He hmunah hian Mizo tena Pathian rawng kan bawl theihna kawng a awm tlat a ni," tiin Vanglaini hnenah a lo sawi tawh a, Mizo footballer-ten ualau takin Pathian thu an tlangaupui zel.

Odisha-in Chennaiyin an draw avangin parukna an ni a, playoff khelh beiseina a nung - tun season ISL-ah hian parukna chinin playoff an khel dawn.