Pathianni zanah Milan Derby

Serie A champion lai AC Milan chuan Pathianni zan dar 1:15-ah Inter Milan an lenchilh dawn, Italian club ropui pahnih hi tun season kal lai atan chuan champion tura rinkai an ni phak rih lo - an inkhel boruak erawh a nung ṭha leh viau tura ngaih a ni.

League hmahruaitu Napoli chuan Spezia an lenchilh thung dawng. Naples club hi Pathianni tlai dar 5:00-a inlan tur an ni a, an chak a nih chuan Milan Derby kan hmuh hmain table chung berah fal takin an lo awm hman ang.

Tlarhnung pawp

Milan hian an match hnuhnung berah table mawng lama awm Sassuolo chu 5-2 in an ngam lo, champion lai hian an match hnuhnung pathumah goal 12 teh meuh an chhuah. Italian Super Cup-ah Inter an ngam lo a, Coppa Italia aṭangin an tla bawk.

Season hmasa maia champion puitu Stefano Pioli ngei pawhin auhel a tawk leh der tawh. Tun hnai khan Milan president Paolo Scaroni leh director Paolo Maldini ten team training an tlawh a, player leh coach chu an ringtawk tih an hrilh.

Milan coach Stefano Pioli chuan, "Hun harsa kan tawh lai aṭanga kan talchhuah dan tur ngaihtuah chhuak tur chu keimah hi ka ni a, player leh coaching staff lam rilru hneh tur pawh keimah tho ka ni, ka mawhphurhna hi hlen ngei ka tum.

"Season hmasa mai khan European club lian dangte entawn kan ni thei, chuvangin theihna kan nei tih chu a chiang. Sang tak kan thleng thei a ni tih kan pawm a ngai, a bik takin inkhel boruak sangah hian kan theihna kan fiah tur a ni ang," a ti.

Milan hian insiamṭhat ngei an tum. Zanin hian Milanello training complex-ah a huhoin hun an hmang dawn. Pathianni chawhnu lamah Inter Milan hmachhawn turin, a huho bawkin San Siro an pan tlang nghal ang - thawhhona ṭha neih tumin awmkhawm tam lehzual an duh.

Tun kara an training dan chuan Milan hian 3-4-3 formation leh 4-3-3 an hmang, ni danga training pangngai aiin minute 40 velin an bei rei bawk. Season hmasa lama an hman thiam 4-2-3-1 formation chu an thlak rih dawn niin a lang.

Beisei nei Inter

Tun hnai khan Inter Milan manager Simone Inzaghi chuan hmabak an la ngah tih a sawi a, Italian club zingah nomawi pathum la beisei ngam awmchhun an nih thu a sawi bawk - Serie A title pawh an la beisei ngam a tihna a ni.

Champions League last 16 an lut a, Coppa Italia lamah semifinal an thleng tawh bawk. Serie A table-ah pahnihna an ni mek a, hmahruaitu Napoli an phak lohna erawh point 13 lai a ni tawh thung, champion chu thil awlsam tak a ni hran lo ang.

Inzaghi chuan, "Eng inelna pawh kan ngai pawimawh em em vek, kan tan chuan nomawi chawi theih zawng zawng chawi hi duhthusam a ni a, mahse chu chu thil awlsam a ni dawn lo. Italian club aiawhtu kan nihna pawh kan hriat a ngai.

"Champion beiseina pathum kan la nei, chungah chuan theihtawp kan chhuah vek ang," a ti a, an hmelma leh elpui ber Milan hneh chu an tih makmawh a ni tih a sawi bawk a, an chak a nih chuan league title beiseina a la nung zel dawn.

Inter hian tun hnai khan an defender pawimawh Matteo Darmian chu kum 2024 June thla thleng daih contract an ziahpui a, zaninah pawh hmun pawimawh a chan a rinawm - kum 33 mi hian tawnhriat a nei ṭha tawh a, inkhel boruak sangah a ṭangkai ṭhin.

An chak a nih chuan Inter hian pahnihnaah an dinhmun an sawhnghet dawn a ni satliah lo, an hmelma Milan hi an beng hniam tel dawn, season thara Champions League khel phak lo thei dinhmunah an dahnghet thei, an tan hei hi thil châkawm a ni ang.