Thailand-ah Mizo boxer te inlan dawn

Mizo professional boxer Vanlalawmpuia leh Zoramchhana te chu vawiin hian The Fighter World Boxing Series-ah an inlan dawn a, boxer pahnih hian WBA Asia title an beisei dawn.

The Animal hming lem an pek Vanlalwmpuia hian 2022 LPS Pro Fight lightweight title a hnek chhuah hnua inhnek a hmachhawn leh hmasak ber tur a ni a, Thai fighter Phoobadin Yoohanngoh-a kawl mek WBA Asia super lightweight title chu chhuhsak a tum dawn.

Khuangthing tlangval Awpa hi professional huangah ṭum ruk chak tawhin vawi khat a tlawm a, ṭum khat a khingpui a inhnehtawkpui - a hmachhawn tur Phoobadin hi kum 19 mi niin, professional boxing vawi 15 a khelh tawhah a chak vek!

Hetihlai hian WBA Asia bantamweight champion Yuttapong Tongdee-a hmaah Zotea a inlan dawn a, September 30, 2022-a LPS Pro Fight bantamweight final-a Tuipui tlangval Lalrinngheta hneh lotu Zotea tan hmabak a hautak dawn.

Mahse, Zotea chuan, "Ka huphurh lo a, chak ka inring," tiin Vanglaini a hrilh - kum 29 mi Tongdee hi vawi kua inhnek a hmachhawn tawhah a chak vek a, Cherhlun tlangval Zotea hi professional boxing-ah vawi li chak tawhin, vawi hnih a tlawm.

Spaceplus, Thailand-a inhnek turah hian Mizo rawlthar ṭhangduang, LPS Pro Fight fly-weight champion lai Laldinsanga a inlan dawn bawk a, professional boxing-a vawi hnih inlana chak ve ve, kum 19 mi Dinsanga hian amah aia kum hniha naupang Jinnawat Samnual a hmachhawn dawn a, Thai rawlthar hi vawi hnih a inhnek tawhah vawi khat chakin ṭum khat a tlawm.

Bangkok-a inhnek tur hi LPS chuan live-in a pe chhuak dawn a, YouTube channel 'TL Boxing Promotion' lamah a en theih bawk ang - chawhnu dar 12:30-ah en ṭan theih a ni dawn.