Jurgen Klopp a la beidawng lo

League Cup leh FA Cup aṭanga tla tawh Liverpool chuan zanin dar 8:30-ah Wolverhampton Wanderers an lenchilh dawn - Reds hi table-ah pakuana an ni mek a, an season hman a duhawm lo hle.

Hei chauh a ni lo - Liverpool hian Wolves zawhah Everton, Newcastle United leh Real Madrid (Champions League) an hmachhawn zui dawn a, an hmabak hi a awlsam lo hle.

Liverpool boss Jurgen Klopp erawh a la zam chuang lo. German coach chuan, "Kan hmabak fixture-in min tibuai lo. Kan hun neih hi hmasawn nan hman kan tum a ṭul a, result ṭha tak nei turin kan bei ang. Season chanve chauh kan la khel a, hlawhchhuah tur tam tak a la awm.

"Wolves hi chumi bul ṭanna tur chu a ni a, eng ang takin nge kan chhawr ṭangkai theih chu kan la hria ang chu," a ti a, fans tam zawk beidawng tawh mah se beidawn a la tum lo.

Klopp chuan sawi zawmin, "Match nga chhung a zawna kan chak theih chuan, 'Kan chak thei a ni,' tih fiah leh chuan a ngai lo - a chhan chu mipuiin an hmu tlat dawn a ni, chu chu a taka kan lantir a ṭul.

"Chu chu kan duh ber chu a ni a, tlawm zawh hnu lawka hrehawm tih hi a pawi lo - a chhan chu hrehawm tawrh nawn kan duh loh phah a, chu chuan phurna min pe thei a ni," a ti a, tun hnaia result duhawm lo chu insiamṭhat nan hman a tum.

Liverpool hian tun hnaiah chanchin lawmawm erawh an nei a, hliam vanga an chawlh reng hnuah player ṭhenkhat chu an lo kir hnai tawh.

Jurgen Klopp chuan, "Thil a pangngai chho ṭan e. Diogo Jota pawhin a ṭhiante a zawm ṭan a, karlehah chuan full training a nei thei tawh ang. Roberto Firmino a lo kir hnai a, Luis Diaz-a'n ngai a awh ṭan tawh a, a tlan ngam tawh.

"Virgil van Dijk chuan karlehah training a zawm dawn a, mahse, a la inpeih lo. Ibrahima Konaté a la inhliam mek a, mahse manganna tur a awm lo. Joe Gomez leh Joel Matip te hi an inkawp fo tawh a ni," a ti a, centre back-a inkawp tur player a neih ṭhat sa thu a sawi.