Bayern hmachhawn thei lo tur Mbappe

Paris St-Germain striker Kylian Mbappe chu a malpui hliam vangin a chawlh rih a ngai dawn. February 14, Thawhlehni zana Bayern Munich nen Champions League last 16 first leg an khelh hunah a inlan thei dawn lo.

France international hi PSG leh Montpellier inkhelh ṭumin a inhliam, penalty vawi hnih a hlah bakah hliam vanga lak chhuah a ni a, a tan chuan match duhawm lo bik zinga mi a ni ngei ang.

PSG hian zanin dar 9:30 hian Ligue 1 match khel turin Toulouse an mikhual dawn, forward Mabppe tel loin an khel ang. League match bikah AS Monaco a hmachhawn thei dawn lo bawk a, hei bakah hian Marseille nen French Cup an khelh hunah a inlan dawn lo.

Season kal laiah Mbappe hian match 26 aṭangin goal 25 a khung tawh, tlarhma lamah a hmun ruak a zau dawn - Neymar chu hliam vangin a chawl mek bawk. Lionel Messi an la nei a, Argentina captain chungah mawhphurhna a sang zual ang.