Valencia tlawmtu Real-in Barca an hnaih zel

Real Madrid chuan awlsam taka Barcelona champion tir an tum lo tih pholangin, Valencia lakah goal hnihin hnehna an chang a, hmahruaitu Catalan club nena an inkar chu point ngaah an sawr zim.

Spanish champion tan Marco Asensio leh Vinícius Júnior te chuan goal khat ve ve an khung a, Karim Benzema siamsak ve ve a ni - hun tawp thlengin goal dang a lut lo a, 2-0 in Real an chak.

Real hi Pathianni zan dar 6:30-ah La Liga match khel turin an inlan lehnghal dawn a, khualmualah Real Mallorca an lenchilh ang - Atletico Madrid chuan zanin dar 11:00-ah Getafe an mikhual dawn thung.

Hmahruaitu Barcelona chu Pathianni zan dar 1:30-ah an inlan dawn chauh a, Catalan club hian Sevilla an mikhual dawn a ni.

Vinicius = 200

Real tan Antonio Rudiger chuan Luka Modric-a ball cross aṭangin goal hmahruai a khungah a inngai a, mahse, video assistant referee rawn a nih hnuah Benzema chu Yunus Musah laka a lo foul avangin goal-ah pawm a ni lo.

Santiago Bernabeu-ah goal lut loin chawlhlawk hman a ni a, second half-ah erawh thawnthu tihdanglamin a awm. Minute 52-naah Asensio chuan a ke vei lam hmangin mawi zetin goal a khung a, player thiam bik ke aṭanga chhuak awm renga mawi a ni.

Real-in an duhtawk mai lo - goal hmahruai an khung aṭanga minute hnih hnu lawkah Vinícius chuan goal a khung ve leh a, Real tan match 200 a khelhna chiah a ni a, goal 49 khungin, assist vawi 49 a nei tawh.

Kum 22 mi forward hian tun season-ah ringawt pawh inelna hrang hrangah match 30 khelin goal 13 a khung tawh a, assist vawi ruk a nei bawk - Vinicius lakah hian a Brazilian pui Gabriel Paulista chu a foul a, minute 72-naah hnawhchhuah a ni.

Benzema a inhliam

Real-in hnehna an chang a, mahse, an thiampuipa Benzema chu hliam vanga lakchhuah a ngai thung - kum 35 mi a ni ve tawh a, French striker-in hliam a nei ve ta fo hi a awm lo hran lo.

Hetihlai hian Real fan-te hlauhthawnna beng dai turin Carlo Ancelotti chuan a striker hliam chu a hlauhthawnawm loh thu a sawi a, chutihrual chuan Pathianni zan an match-a inlan nghal erawh Benzema tan a la hma mai thei.

Ancelotti chuan, "Ni thum dan zela inkhelh a, chawlh hahdamna hun a awm loh chuan hetiang hi a thleng ve thei a ni," a ti a, fixture tawt lutuk chuan player dinhmunah nghawng a neih ṭhin thu a sawi.

Real hian February 21 zanah Liverpool chu Champions League last 16 khel turin an lenchilh dawn a, hemi hma hian league match thum leh Club World Cup match khelh tur an nei!