Bucks tan Giannis Antetokounmpo a rintlak

Giannis Antetokoun-mpo chuan Milwaukee Bucks tan innghahna tlak a nihzia a lantir leh ta. Greek tlangval hian point 54 neiin Bucks hi Los Angeles Clippers lakah 106-105 in hnehna a chanpui.

Nimin zing NBA regular season inkhelah, player ṭha Giannis-a'n point a neih hnem bakah rebound vawi 19 a la bawk a, court chhunga minute 36 hun a hman chhungin a thawhhlawk takzet.

January aṭanga chhiarin Giannis hian vawi thum chu match khata point 50 neih tlin a nei der tawh. Ani bakah hian Clippers an hneh theih nan Khris Middleton chuan point 16 a nei bawk, ani hi bench aṭanga lut a ni.

Bucks hian tun season kal laiah match 35 hnehna an chang ta a, Eastern Conference table-ah pahnihna an ni. An chungah hian vawi 37 chak tawh Boston Celtics chiah an awm, anni pahnih hi conference champion tura rinkai an ni.