Ram tan Varane inlan tawh dawn lo

Manchester United centre back Raphael Varane chuan ram tana inkhelh a chawlhsan thu a puang a, kum 29 mi lek ni mah se France defender hi Les Bleus jersey nen kan hmu tawh dawn lo.

Varane hian France tan match 93 khelin goal nga a khungsak a, World Cup 2018-ah champion nomawi chawiin, UEFA Nations League 2020-21 ah France chu a champion pui bawk.

Kum 2013-a ram tana a match hmasa ber kheltu Varane chuan, "Hun rei tak chhung ram tana ka inlan thei kha ka nuna chawimawina ropui ber pawla mi a ni. France jersey pawl ka hak apiang hian ka inchhuang em em ṭhin a, theihtawp chhuahin, ka theihna zawng zawng nen chak ngei ka tum ṭhin.

"Thla engemaw zat chu ka ngaihtuahna ka seng tawh a, tun hi chawlh hun ṭha berah ka ngai a ni," a ti a, Varane hma hian Tottenham Hotspur goalkeeper Hugo Lloris chuan France tana inkhelh a chawlhsan thu a lo puang tawh a, Karim Benzema pawhin a chawl nia hriat theih tur takin social media lamah a lo ziak tawh bawk.

France captain Lloris-a'n ram tan inkhelh a chawlhsan hnua captain armband hreng mai tura tam takin an ngaih Varane chuan, "Naupangte ni chunga France 98 hun kan tawn kha ka hre reng ṭhin - anmahni ang kha nih ve ka châk ṭhin a, kum 20 a liam leh meuh chuan ka hringnun hun tawn ropui ber pawl tawngin, World Cup nomawi kan hawn a ni. July 15, 2018-a thil thleng kha ka hre reng tawh dawn a, ka tan hun tawn duhawm ber zinga mi a ni," a ti.

France coach Didier Deschamps chuan, "Ram tana World Cup thlenga a hnathawh leh hruaitu ṭha a nihnate thlir chuan, a chawl mai hi pawi ka ti a, mahse, a thutlukna chu ka zahsak a ni," a ti a, Varane dan a tum lo.