Greenwood-a'n thubuai a nei tawh lo

Manchester United forward Mason Greenwood-a'n pawngsual tumna leh tharum thawhna thubuai a neih chu finfiahna a awm ṭhat tawk loh avangin a chungchang ngaihtuahtu Crown Prosecution Service chuan an titawp.

Kum 21 mi Greenwood hi January 2022 khan thlalak leh video-ah a kut hnu mawi lo taka a lan avangin thil thlen dan zir chian a ni a, hemi hnu hian pawngsual tumna leh tharum thawhna thubuai siamsak a ni.

English forward thil tih sual hi January 30, 2022-ah hai lan a ni a, hemi ni vek hian Manchester United-in an hrem zui a, training-na leh match day squad-ah an telh tawh lo. Nike pawhin an inthlunzawmna chu titawp rihin EA Sports pawhin FIFA Games aṭangin an dah bo bawk.

Kum khat chhung thubuai ngaihtuah a nih hnuah February 1, Ningani zan khan Crown Prosecution Service chuan, "Tuna thubuai bikah hi chuan thuhretu pawimawh an inhnuhdawh bakah thil (material) thar a nih bawk avangin tihtawp a ni," tiin thubuai tihtawp chhan an sawifiah.

Man United erawh Greenwood-a thubuai hi tawp tawh mah se team chhungah lakluh mai an la tum lo. English club chuan, "Mason Greenwood-a chungchang hmalakna thar neih hmain club-in a ṭul angin a zir chiang ve leh ang," tiin thuchhuah an siam a, a bak an sawi zui loh tur thu an sawi tel bawk.

Greenwood hi talent nei ṭha bik a ni a, kum 21 mi chauh niin kum khat zet inkhel tawh lo mah se Man United tan hian league match 83 a khel hman tawh a, goal 22 a khung tawh bawk. Chutihrualin a nungchang erawh a ṭha bik lo tih a lang a, tuna buaina a tawh hma hian Phil Foden nen Covid-19 dan an bawhchhiat avangin Iceland aṭangin September 7, 2020 khan thawh haw an ni tawh a ni.