Zaninah Bundesliga an khel dawn

German rama football inelna sang ber Bundesliga chu zanin aṭangin khelh chhunzawm a ni leh dawn ta. Inkhel tur zingah chuan dar 7:00-a Borussia Dortmund leh Schalke ten 'Revierderby' an khelh tur chu ngaihven hlawh ber a ni.

Champion lai Bayern Munich chu Pathianni zanah an inlan dawn thung a, table laihawl luahtu Union Berlin lakah harsa lutuk loin point thum an hmu thei turah a ngaih theih.

Bundesliga hi March 13 aṭang khan Covid-19 vangin an chawl lailawk. European league lian panga zingah chuan khel chhunzawm leh hmasa ber tur an ni a, hri leng kara football an khelh tur hian ngaihven a hlawh phah.

German rama Ruhr ram bial khu lungalhthei (coal) leh kahpathir (steel) siam chhuahna hmun a ni a, khawpui lian leh changkang tak ni lo mah se thingtlang hmun lian tak chu a ni - German chhunga thingtlang hmun lian ber tih a ni ṭhin.

Mipui maktaduai nga vel an awm a, football pawh an ngaina. Dortmund leh Schalke bakah hian VfL Bochum leh MSV Duisburg te pawh an awm a, anni ho an intawn fuh hian Ruhr Derby (Revierderby) an ti.

Dortmund leh Schalke te hi champion tum leh European football khelh tum tiin a sawi theih a, a tu zawk zawk tan pawh point hmuh a pawimawh. Signal Iduna Park-ah fans lut thei dawn lo mah se a pawn lamah an pungkhawm a nih pawhin a mak lo ang. Dortmund mayor Ullrich Sierau chuan stadium pawna pungkhawm lo turin a lo chah tawh.

January thla khan Dortmund-in goal thun khawl an lalut a, a hming chu Erling Haaland a ni. Norwegian striker hian Bundesliga match riat a khelh aṭangin goal kua a khung, goal hmasa panga chu league a khelh ṭan tir lam minute 56 chhunga a khung a ni hial.

Kum 19 mi Haaland chuan, "Boruak leng velin min ti buai lo, tuna pawimawh ber chu kan inkhel leh thei tur hi a ni. Tun hmain derby ka khel ve zeuh zeuh tawh, tun ṭuma kan khelh tur erawh ka tan a vawi khatna a ni a, a boruak pawh a danglam dawn," tiin a sawi.

Dortmund hian match khelh hmabak pakua la awmah Bayern chu point liin an phak lo mek. Haaland chuan, "Eng pawh a la thleng thei, match khelh hmabak a la tam avangin chiang sa a la awm lo. Schalke hneh a pawimawh a, sang tak thleng turin theihna kan nei tih ka hria," a ti.

Schalke hian player ropui leh hlu tak tak an lo nei tawh ṭhin, tuna an player kawl laiah chuan Daniel Caligiuri hi a hlu ber zinga mi a ni - a bik takin Revierderby-ah chaun ani aia tawnhriat nei ṭha leh rintlak an awm chuang lo ang.

German midfielder hian Revierderby-ah goal nga a khung tawh, a ke artui hliam a dam fel tawh a, zaninah Dortmund tana ven ngun ngai bik a ni dawn. Season kal laiah Schalke goal nawr kawnga a khaipa a ni.

Kum 32 mi Caligiuri chuan, "Ka dam tawh, tunah chuan inkhel ka ngaihhlut bik khel turin ka inpeih tawh e. Inkhel tura kan inbuatsaih dan leh kalphung a danglam ta hle a, a taka tih chhin a châkawm tawh hle," tiin a inpeih thu a sawi.