Everton mualah Arsenal an chak lo

Premier League hmahruaitu Arsenal chu Everton lakah 1-0 in an chak lo. Mikel Arteta-a naute hi league season kal laia an chak loh vawi hnihna a ni a, table chung berah erawh an la awm chhunzawm.

Inrinni zan khan Toffees lamin Frank Lampard an ban hnua an match hmasa berah hnehna an chang, manager thar Sean Dyche tan bul ṭanna duhawm a ni. Inrinni zana goal awmchhun hi defender James Tarkowski tauh luh a ni.

Arsenal an chuai

Mikel Arteta-a'n Arsenal player rilru put hmang a thlak danglam a, tun season an inkhel chu a tir aṭangin a nung nghal phat ṭhin. Goodison Park-ah erawh tihsual an ngah, ball an hloh fo bakah goal an nawr hleithei lo.

Martin Odegaard tihsualah Amadou Onana-a'n ball a lalut a, Gunners captain hian a um phak lo, mahse, Onana-a ball cross hi striker Dominic Calvert-Lewin chuan a lo tlawh phak lo chiah, a tlawh goal lohna hi tlemte chauh a ni.

North London club hian box chhungah ven lohin Abdoulaye Doucoure an dah bawk, ani hian hnai takin a duh tawka ball tauh tur nei mah se goal zawnah a tauh thei lo, mikhual team an la him hram hram zel.

Gabriel Martinelli an dang bet hneh hle a, mual sir lehlama awm Bukayo Saka-a'n ball kang lai a hlap chu goal a luh hmain an lo dansak hman - English forward pawhin ni danga a inkhel a phak lo, remchang a insiam hleithei lo.

Goal khat

Everton coach thar Dyche-a'n ruahmanna fel tak a nei, a winger-te chu tlarhnung pui turin a tlan let tam tir hle a, hei hi Arsenal hlauhawmna lai an chhut chah theih chhan a ni, forward Saka leh Martinelli te an dang chep thei hle.

Danglamna neih tumin Arsenal lamin Thomas Partey leh Martinelli an la chhuak a, midfielder thar Jorginho leh Leandro Trossard te an dah lut. Mahse, an insiamrem hmain Toffees tan Tarkowski chuan goal pawimawh a tauh lut.

Premier League season kal laia midfielder hmuhnawm berte zinga mi Odegaard tan zan duhawm lo a ni, a ven tur a ven hneh loh vangin an khingpui lamin goal an khung, ball thiamin fing viau mah se tharum a neih tlem pawina a lang.

Substitute Trossard-a'n si phurh sut ngei a tum, ṭha takin goal-ah shot mah se England keeper Jordan Pickford a paltlang thei tlat lo. Everton lamin an phu ang ngeiin point thum an hmu, inelna hrang hrangah match 11 chhung an chak vawi khatna a ni.

Eng nge an sawi?

Arsenal manager Arteta chuan, "Everton khan an khel ṭha em em a, hnehna chan phu an nih avangin ka lawmpui. Tun dinhmun thleng tura kan bul ṭanna kan hriat thar leh a ngai, kan khelh dan phunga khel leh turin team leh mimal kan inbuatsaih ang," a ti.

Beisei phak baka ṭhain Arsenal hian season an hmang, mah se an hmahruaina hi a la nghet tawk lo. An match lehpekah Brentford laka point an hloh a, champion lai Manchester City nen an inkhelh hunah, an chak lo a nih chuan pahnihna an ni daih thei.

Everton manager Sean Dyche chuan, "Tuna hnehna kan chan avang hian kan insiamṭha nghal vek tihna a la ni lo, hei chu a bul ṭanna chauh a la ni. Ka naute khelh danah ka lawm a, he team hian theihna a nei tih chiang takin a lang," a ti a, an khelh danah a lungawi hle.

Match 21 aṭangin Everton hian point 18 an hmu a, table-ah 18-na an ni. Dyche-a naute hi tlahniam thei chinah an la awm a, inhamtan tumin season chawhnu lamah theihtawp an chhuah ang, player an neih dan chhutin EPL khel zel turin an ṭha tawk.