Chelsea tlarhma a bil

Thlasik bazara pound maktaduai 288 hmangtu Chelsea-in Zirtawpni zan khan Fulham an mikhual a, 0-0 in an inhnehtawk.

Stamford Bridge-ah Premier League player man to ber Enzo Fernandez bakah thlasik bazara lakluh Mykhailo Mudryk leh Benoit Badiashile ten bul an ṭan a, bench aṭangin Noni Madueke leh David Datro Fofana te lut bawk mah se goal an khung theih miau loh avangin point khatah an lungawi a ṭul.

Fulham-in Andreas Pereira hmangin Blues keeper Kepa Arrizabalaga hna an siam hmasa a, mualneitu lamin chance ṭha an ngah zui zawk. Kai Havertz-a'n hnai tak aṭangin a tlawh lut lo a, Germany international Havertz hian keeper chauh a hmachhawn hnuah goal ban a pet per bawk.

Second half-ah mipui mit fukna Enzo-a'n box pawn aṭangin a pet a, goal zawnah a kal lo. Conor Gallagher-a'n hun ṭha a bawhpelh a, chance ṭha ber erawh Ivorian forward Fofana chungah a tla. Molde aṭanga London club zawmtu Fofana hian Fulham keeper Bernd Leno a bum hnuah defender Issa Diop paltlang leh mah se a ball pet chu Tim Ream-a'n ṭha takin a dang.

Chelsea hi an chak zo lo nachungin hma an sawn tih a hmuh theih. January 13 khan Blues hian Cottagers hi khualmualah 2-1 in an hneh lo a, tun ṭumah erawh goal hmaa an vanduai vang chauhin point thum an hlawh chhuak lo.

Mak ang reng tak erawh nipui leh thlasik bazara pound maktaduai 500 chuang hmangtu club hian Fulham lakah 'out and out striker' rin ngam an nei lo. Pierre-Emerick Aubameyang chu dam ṭha mah se Champions League squad-ah an dah lo a, Cottagers lakah pawh squad-ah a awm lo.

Second half-a lut Fofana hian season liam ta khan Norwegian league-ah match 24 khelin goal 15 khung tling mah se kum 20 mi chauh a ni a, Chelsea rinrawl ni turin tawnhriat a ngah tawk lo. Chutihrualin World Cup-a best young player Enzo erawh a rintlak hle. Lehkha pawimawh tihfel hman loh vanga PSG zawm ta lo Hakim Ziyech pawh chhuak tur zinga mi ni mah se transfer a tlawlh hnuin bul a ṭan lehnghal.

Chelsea hian Liverpool lakah goal an khung thei tawh lo a, match hnih chhung a zawnin goal an khung thei tawh lo. February 11, Inrinni zanah Blues hian Newcastle United cheltu West Ham an tlawh dawn a, Graham Potter-a'n tlarhma a tuai hriam hman a ṭul ang.