MPL Under 18 a hnai

Mizoram Premier League Under-18 (2022-2023) chu February 14, Thawhlehni aṭanga khelh tan tura ruahman a ni. Inelna hi double leg-a khelh tur a ni a, a tawpah point hmu sang team pahnihin final an khel ang.

MPL U-18 Organising Board chuan tun hmaa harsatna awmte thlirin kum dik thei ang bera kalpui an tum a. MFA Registration Committee nena ṭangkawpin CRS-a inziak lut turte birth certificate zawng zawngte Economic & Statistic Department-ah a dik leh dik loh endik turin an thawn zel a. Pian kum dik lote hi department lam hian an Birth Certificate dik tak nen an rawn hriattir zel a ni.

Tun aṭang chuan CRS registration titur reng rengte pawh birth certificate dik tak nen lo chuan a tihtheih tawh dawn lo a, football inelnaa kum dik taka kal turin ruahmanna siam a ni.

MPL U-18 hi khelmual remchan dan azirin khelh dan tur hi ruahman chhoh zel a ni ang a; hetihlai hian MFA Under 15 League pawh team parukte khelh turin hmalakna chak takin a kal zel bawk.

Hei bakah hian Reliance Young Champs nen ṭang kawpin Naupang League kalpui mêk a ni a, Aizawl bakah Champhai, Lunglei leh Kolasib-ah kum lama naupang zawkte tán inelna kalpui a ni.