Zaninah Fight Night semifinal thawh hnihna

GIG Motors Mizoram Fight Night semifinal zan hnihna chu zanin hian Dawrpui Multipurpose Centre-ah neih a ni dawn. Bout hmasa ber hi zan dar 8:00-ah ṭan a ni ang a, bout khat hi round nga zel a ni tawh dawn.

Bout hmasa bera inhnek tur Lalawmpuia leh HC Rama te hi tawnhriat ngah zawk hnehtute an ni a, an intumtawk viau turah a ngaih theih. Mipa lamah hian 63 kg-a James Laltlanmawia leh Lalnunzira te inhnek hi en a châkawm viau.

Ainawn Veng tlangval James hi boxer hmuhnawm a ni a, boxing thiam vanga Indian Army-a lut niin a che pawh a mawi hle. A khingpui tur Haulawng tlangval Lalnunzira hi nikum NE Olympic-ah khan silver medal a la thung.

En châkawm ber tur erawh Zochhuanawma Fanai leh Zonunzira te inhnek tur hi a ni a, NE Olympic hnuhnung bera gold medalist Zochhuana hi rinkai zawk ni mah se Mizoram aiawh pawha fehchhuak tawh Zonunzira hi dah hniam a rem lo.

Hmeichhe lamah Rudy Lalhmingmuani leh Naom Chinsannuam te a hmuhnawm bawk ang. Lawngltai nula Rudy hi India aiawha fehchhuak tawh a ni a, Naomi hi national level-a inhnek fo tawh a ni thung.

Fight Night hi Zonet Rihnim leh Zonet Youtube (members only) kaltlangin a en theih. Inelna hi Aizawl District Boxing Association leh Zonet buatsaih a ni a, a hmuna Fight Night en man hi Rs 50, Rs 100 leh Rs 200 te a ni ang. Final hi February 8, Nilaini zanah neih tur a ni.