Man United an ṭang tluan, Magpies an phûr tluan lo

Thlasik transfer hun a zo a, Premier League inkhel a hmuhawm nghal. Manchester United-in Crystal Palace lakah ṭha taka bul ṭanin 2-0 in hma hruai mah se Casemiro hnawhchhuah a nih hnuah an talbuai a, 2-1 in an chak thei hram.

Newcastle United pawhin St James Park-ah nung takin inkhel an ṭan a, rang takin goal khung mah se West Ham nen 1-1 in an inhnehtawk.

Erik ten Hag-a hoten season thara Champions League khel thei turin kawng dik an zawh a, Arsenal an chetsual avangin champion thei zinga mi an la ni thei bawk. Newcastle erawhin point hnih hlu tak an hloh a, Europe-a inelna sang ber hmachhawn turin fiahna hautak zawk an paltlang a ṭul ang.

Goal leh red card

Old Trafford-ah Man United-in inkhel an thunun a, minute sarihna lekah ball-in Will Hughes-a kut a fuh avanga an penalty hlawh chu Bruno Fernandes-a'n goal-ah a chantir. Second half-ah Alejandro Garnacho leh Luke Shaw te thawhrah sengin Marcus Rashford-a'n minute 62-naah a khung leh bawk.

Man United-in awlsam takin hnehna an chang tura a ngaih theih laiin Jeffrey Schlupp chuan mualsirah Antony a nek tlu a, Casemiro-a'n a hnampui leh khelhpui Antony hi rawn chhanin buaina tenau a chhuak. Referee Andre Marriner-a'n buaina thlentirtu Antony leh Schlupp te yellow card a pe ve ve a, VAR-a ṭhu Tony Harrington-a'n Casemiro chet dan a hmuhin referee a hriattir.

Marriner-a'n mualsira monitor aṭangin Casemiro-a'n Hughes a rek lai chu a hmu a, Brazilian midfielder hi red card a pe. Casemiro hian hrem vangin Arsenal a hmachhawn thei lo tawh a, tun ṭuma direct red card a hmuh avang hian Leeds United ṭum hnih an hmachhawn hunah leh Leicester City an mikhual hunah a inlan thei lo ang.

Fak phu Ten Hag

Palace-in beiseina thar an nei a, Marc Guehi ball tauh chu David de Gea-a'n ṭha takin a dang. Amaherawhchu hemi aṭanga Eagles-in corner an hmuh chu goal-ah a chantir. Substitute Naouirou Ahamada-a'n volley ṭha lo mah se Schlupp-a zawnah a kal a, Palace forward hian mawi zetin minute 76-naah a 'flick' goal.

Man United an talbuai a, Palace goal bawh a na hle. Ten Hag-a hoten an ṭan tluan theih nan Argentine defender Lisandro Martínez a khel ṭha a, chutihrualin Dutch manager-in thutlukna huaisen a siam. Ten Hag hian goal venhim duhin Harry Maguire leh Victor Lindelof te a luhtir a, second half-a a luhtir chauh Garnacho a la chhuak ngam.

A tawpah Man United-in an tum ram an thleng a, 2-1 in hnehna an chang. Player thar Marcel Sabitzer pawh minute 81-naah a rawn inlan a, a inkhelh hun chhung a rei lo chungin a khelh danah United ṭantuten lawmna tur an hmu ang.

Magpies an chelh

Newcastle United-in West Ham lakah nung takin bul an ṭan a, minute khat pawh tling loah Joe Willock-a'n ṭha zetin a pet goal nghal. VAR hmanga ennawn a nih hnuah Willock-a'n ball a chan hma hian ball hi a out hman avangin pawm a ni ta lo.

Hammers an vannei a, VAR-in a chhan avangin keeper Lukasz Fabianski-a'n goal kick a pet chhuak ta zawk. Amaherawhchu, Magpies hian goal kick aṭanga ball chhuak hi changin an nawr let lehnghal a, minute thumna lekah Callum Willson-a'n goal hmahruai a khung.

St James' Park-ah thawm a ṭha a, amaherawhchu ṭum khat inthlahdah zeuh an tuar. Hammers midfielder Lucas Paqueta-a'n corner aṭanga ball kal chu minute 32-naah siphurh sut nan a hmang. David Moyes-a hote an insiamrem a, Magpies lakah point khat hlu tak an hlawh chhuak.

Chutihrualin Magpies captain Kieran Trippier ball vawrh a hlauhawm ṭhin a, Everton aṭanga an lakluh Anthony Gordon pawhin pass ṭha bik rawn neiin Wilson-a'n a hmang ṭangkai thei ta lo. Magpies-in League Cup semifinal-a hnawhchhuah Bruno Guimares an chhawr thei lo a, manager Eddie Howe pawhin Brazilian midfielder awm loh an tawrh thu inkhelh banah a sawi.