PSG chakna Lionel Messi

Lionel Messi-a goal mawi hmangin Paris Saint-Germain chuan Toulouse 2-1 in an hneh. Paris club hian Ligue 1 match 22 aṭanga point 54 hmuin table-ah an dinhmun an sawhnghet zel.

Inrinni zan Paris khawpuia inkhelah, mikhual Toulouse lamin Branco van den Boomen hmangin goal an nei hmasa a, mahse chawlhlawk hmain Achraf Hakimi chuan a sut.

Second half-ah Hakimi bawkin ball a lalut, mahse a ball chan a thunun thei lo, a duh aiin a tiper na hret - ball perna laiah tak Messi a lo awm, ani hian laklawh nei miah loin yard 25-a hla aṭangin a pet lut pawp.

Neymar leh Kylian Mbappe te hliam vangin an inkhel thei lo, an hmatawng player ṭha pahnih awm lo mah se Messi an neih avangin PSG tan buaina tur a awm lo, an duh angin point thum an hmu thei.

Forward pahnih chauh an ni lo, Marco Verratti leh Sergio Ramos te pawh hliam vangin an inlan thei lo. Tun thla chawhnu lamah Bayern Munich nen Champions League an khel dawn, coach Christophe Galtier tan thluak hman a ngai khawp ang.

Nizan khan pahnihna Marseille chuan Nice an hmachhawn a, result kan hre hman lo. Marseille hi an chak a nih chuan an inkara point riat awm hi an sawr zim leh ang. PSG leh Marseille te hi French Cup last 16-ah an la intawng zui leh dawn.

PSG coach Christophe Galtier chuan, "Leo khan team a khaiding, player pawimawh tak tak awm loh karah hruaitu a nihna a takin kan hmu," tiin Messi a fak a, season chawhnu lam hun pawimawh an hman turah a naute chu dam thuai tura a duh thu a sawi bawk.