Bangkok khawpuiah Mizo boxer an tlawm

Mizo professional boxer hriat hlawh Vanlalawmpuia leh Zoramchhana ten The Fighter World Boxing Series-a WBA Asia title an beiseina chu a thamral a, an khingpui lakah an tlawm ve ve.

2022 LPS Pro Fight lightweight title kawltu Vanlalawmpuia'n WBA Asia super lightweight title hlawh chhuak turin, Thai fighter Phoobadin Yoohanngoh lakah hna a thawk ṭha tawkah inngai mah se, judge-ten a ngaihdan an ṭawmpui lo a, chak lo zawkah an puang.

The Animal hming lem an pek boxer hi professional huangah vawi riat inhnek a hmachhawnna a ni a, vawi hnih a tlawm ta - vawi ruk a chak tawh thung a, a record tih ṭhatna remchang chu Khuangthing tlangval hian a chhawr thei lo.

WBA Asia bantamweight champion Yuttapong Tongdee-a hmaah Zotea a inlan a, September 30, 2022-a LPS Pro Fight bantamweight final-a Tuipui tlangval Lalrinngheta hneh lotu Zotea hian, "Ka chak ka inring," tiin Vanglaini hrilh mah se a tlawm. Cherhlun tlangval Zotea hi professional boxing-ah vawi li chak tawhin, vawi thum a tlawmna chiah a ni.

Spaceplus, Thailand-a inhnekah hian LPS Pro Fight flyweight champion lai Laldinsanga a inlan bawk a, kum 19 mi, Lunglei rawlthar Dinsanga hian amah aia kum hniha naupang Jinnawat Samnual chu technical knockout-in harsatna nei loin a hneh thung - vawi thum professional fight-a neihah a la chak vek.