Fight Night Boxer pariatin final an lut

GIG Motors Mizoram Fight Night semifinal thawh khatna chu Inrinni zan khan Dawrpui Multipurpose Centre-ah neih a ni a, inelna hmawr bawk a hnaih tawh avangin boruak pawh a sang ta hle.

Bout hmasa berah Niawhtlang tlangval Lazaenpuia'n amah aia tawnhriat nei ṭha Freddy Lalchhantluanga a barakhaih nghal. Hmeichhe 51 kg-ah tawnhriat nei ṭha Lalrinchhani Pautu chu TC Malsawmkimi lakah a dingchang hram.

Mizo boxer ṭha, Tuipui tlangval Laldinmawia'n 57 kg-ah C. Rualthankhuma hmachhawnin harsatna a tawk lo a, Tuipui tlangval dang Lallawmawma pawhin final lut turin harsatna nei loin Freddy Lalchhanchhuaha a hneh bawk.

Rin lawk ang ngeiin Muthi tlangval Malsawmkima leh Ainawn tlangval Lalrinawma (Ago-a) te inhnek a hmuhnawm. LPS Pro Fight-a champion tawh Ago-a'n tun hnaia boxer rawn ṭha chhuak zinga mi Malsawmkima lakah a tawnhriat neih ṭhat a hmang ṭangkai thei lo.

Hmeichhe boxer lar Lalbuatsaihi'n amah aia NE Olympic-a kal Lalthuthlungdiki chu unanimous decision-in a hneh a, international medal hial la tawh BS-i'n fiahna hautak ni tura ngaih chu harsatna nei loin a paltlang a ni.