Chak dan theihnghilh Liverpool

Hmanni lawka khawvel club lianten hmachhawn an châk loh, European football-a team hmuhnawm ber pawl Liverpool an tlawm leh ta - "Liverpool an tlawm," tih hi thil mak a ni lo a, "An chak," ti ta ila, thuthar danglam a ni tawh zawk!

Inrinni zan khan Premier League-ah Reds hian Wolverhampton Wanderers chu 3-0 in an ngam lo a, minute ngana lekah Joel Matip chuan an lamah tilutin, Craig Dawson chuan minute 12-naah a belhchhah bawk.

Liverpool an talbuai laklawh maiah fans tam takin an ngai a, an thawh leh an beisei - mahse, Jurgen Klopp-a naute an tho tawh lo a, minute 27-naah Ruben Neves chuan khung ve lehin, 3-0 in Liverpool an tlawm.

Reds manager Klopp chuan, "Kan match khelh leh turah kan insiamṭhat nghal a ngai. Everton-in zaninah hnehna an chang a, an phur vanglai tak a ni - kan theihna kan pholan a ṭul," a ti - inkhelh zawh apianga a thusawi a ni ta deuh der!

Liverpool hian February 13, Thawhṭanni zan dar 1:30-ah Sean Dyche hoa Arsenal hnehtu Everton an mikhual dawn a, February 18 zanah season hmang ṭha tak Newcastle United lenchilhin, February 21 zanah Champions League last 16 khel turin Real Madrid an mikhual leh bawk ang.

Merseyside club hian an tlawm avangin table-ah 10-na dinhmun an luah a, anni aia match khata khel tam Chelsea chu point khatin an phak lo - palina Newcastle chu point 11 zetin an phak lo mek a, Reds tan season thara Champions League khelh ringawt pawh a harsa tawh dawn.

Klopp chuan, "Inkhel ṭantir lam minute 12-ah khan a pawi tur ang chu a pawi zo tawh. Hetiang ang game-ah chuan khatianga tihsual kha a thiang lo - induh chuan min sawiselin, kan tihdan dik tawk lo in sawi thei ang. Kan pawm thlap - a chhan chu a tir minute 12 ang kha chu a thleng tur a ni lo," a ti a, an khelh danah a lawm lo hle.

Wolves goal hmahruai hi Hwang Hee-chan-a cross Matip-a'n a dan per luh a ni a, a tih tur ti tawk lo Trent Alexander-Arnold puh theih a ni. Dawson-a goal khung chu Liverpool tlarhnung pherh vang, tia sawi theih a ni a, Neves-a goal erawh Adama Traore thawh ṭhat rah a ni.

A tawi zawnga sawi chuan Liverpool-in siamṭhat tur tam tak an nei a, a rang lama an insiamṭhat loh chuan season tharah European football pawh an khel kher lo ang.