Champions League khelh tum Atletico chak zo lo

Inrinni zana Spanish La Liga inkhel ngaihven hlawhah Atletico Madrid chuan hnehna an chang zo lo a, an mikhual Getafe nen 1-1 in an inhnehtawk - Atletico tan Champions League kalkawng a hautak sawt.

Atletico khelmuala inkhelah mualneitu lamin goal khung theihna remchang vawi tam nei mah se, an chhawr thei lawk lo a, minute 60-naah an khung thei hram - he goal hi hriatreng tawh tur a ni nghal!

Thomas Lemar-a shot per lehlam chu Angel Correa chuan goal-ah a chantir - mahse, he goal hi a tirah pawm a ni lo a, Argentine player hi coach Diego Simeone chuan a la chhuak zui.

Mahse, video assistant referee a inrawlh a, referee-in goal a nih leh nih loh a ennawn - referee Mateu Lahoz-a'n video replay hmanga a ennawn hnuah Correa goal khung a pawmsak.

Mahse, kum 27 mi Correa hi a goal khung pawmsak a nih hian bench lamah a ṭhu tawh a, a ṭhiante chuan an ṭhianpa ṭhutna lam hi panin a goal khung an lawm.

Atletico hlim chhung erawh a rei lo. Hnehna chang tawh mai tura ngaih an nih laiin an chesual a, referee-in penalty box-a Madrid khaw club midfielder Saul Niguez handball a hmu fuh a, penalty spot a kawk.

Mikhual team Getafe tan forward chhuanvawr Enes Unal lo pen chhuakin, goal-ah a chantir a, hun tawp thlenga goal dang a luh loh avangin team pahnihin point-ah lungawi an zir.

Kum 25 mi Enes Unal hian tun season inelna hrang hrangah match 22 khelin goal ruk a khung a, assist vawi nga a nei bawk - season hmasa khan La Liga-ah hian goal 16 a khung tawh a, a chanchin kan hriat zel a rinawm.

Nizan khan Real Madrid chuan khualmualah Real Mallorca an lenchilh a, Barcelona leh Sevilla an intawng bawk - he thu buatsaih a nih lai hian an result kan hre hman lo.