Club World Cup - Al Ahly an chak

2022 FIFA Club World Cup chu khelh a ni leh ta a, Inrinni zan khan CAF Champions League pahnihna Al Ahly chuan 1-0 in Seattle Sounders FC an hneh.

Al Ahly tan hian Mohamed Magdy chuan minute 88-naah inkhela goal awmchhun a khung a, CONCACAF Champions League nomawi kawltu Seattle tan beisei tur a awm tawh lo.

FIFA Club World Cup hi first round aṭangin khelh ṭan a ni a, first round-ah hian OFC Champions League nomawi kawltu Auckland City leh Al Ahly an intawng.

Egyptian club ṭha Al Ahly hian first round-ah hian 3-0 in Auckland City an hneh a, second round-ah an chak leh tak avangin semifinal an lut - European champion Real Madrid nen an intawng ang.

February 8, zan dar 12:30-ah Al Ahly leh Real hi an intawng dawn a, Al Ahly-in vawi hnih hnehna an lo chan tawh avangin inringtawk takin Real an hmachhawn thei dawn.

Inrinni zana second round inkhel dangah CAF Champions League nomawi chawitu Wydad Casablanca leh AFC aiawha inlan Al-Hilal te an intawng a, 1-1 a an inhnehtawk hnuah penalty hmangin Saudi club ṭha Al Hilal hi 5-3 in an chak.

Rabat-a inkhel boruak 'hot' takah hian red card pahnih phawrh a ni a, Wydad midfielder Yahya Jabrane chu hun pek belhah hnawhchhuah niin, Al Hilal midfielder Mohamed Kanno chu hnawhchhuah a ni bawk.

Al-Hilal hian February 7 zanah semifinal an khel dawn a, South American champion Flamengo nen an intawn dawn avangin kalkawng a awlsam lo ang.

FIFA Club World Cup-ah hian khawmualpui champion ṭheuh leh, inelna thlengtu ram league-a champion-te an intawng ṭhin - tun inelna hi Morocco-in an thleng a, an ram league champion Wydad Casablanca chu African champion an ni tel bawk.

Hei vang hian hmun ruak pakhat a awm a, CAF Champions league pahnihna Al Ahly an tel phah - semifinal hial an lut ta.