Haller-a'n Dortmund tan goal a khung

Sebastien Haller chuan tilmu cancer natna a hneh hnuah Inrinni zan khan Borussia Dortmund tana a goal hmasa ber a khung. Dortmund hian Freiburg 5-1 in an hneh a, Haller hian Yellow Wall (Dortmund ṭantu ruhkawl) hmaah Dortmund goal thumna hi minute 51-naah a tauh goal.

Kum 28 mi Haller hi Ajax aṭanga Dortmund a zawm aṭanga ni nga hnu lekah a tilmu a cancer tih hmuhchhuah a ni a, German club tan a inlan lawk thei lo. Ivory Cost international Haller hian chemotherapy ṭum li a la a, nikum November thla khan zai a ni bawk.

Haller chuan, "Ka theihna tak tak chhuah turin hun ka la mamawh rei dawn a, chutihrualin goal ka khung avangin ka lawm. Goal tam zawk ka khung theih ka beisei," tiin a sawi.

Dortmund tan hian Nico Schlotterbeck, Karim Adeyemi, Julian Brandt leh Gio Reyna ten goal khat ṭheuh an khung a, chiang taka hnehna an chan avangin Bayern Munich elpuitu an pungah a ngaih theih.

Bundesliga-ah hian ṭum dang ang lo takin champion tur a la chiang lo hle. Inrinni zan khan Union Berlin chuan Mainz 2-1 in an hneh a, hmahruaitu thar an ni. Chutihrualin nizan khan Bayern Munich-in Wolfsburg an tlawh a, result hi a la danglam thei bawk.