East Bengal-in Blasters an barakhaih

Indian Super League khelh chhunzawm zel a ni a, Zirtawpni zan khan East Bengal chuan Kerala Blasters laka an chak hmasak ber ni turin 1-0 in hnehna an chang.

Kolkata club tan striker chhuanvawr Cleiton Silva chuan inkhela goal awmchhun a khung a, tun season-ah league goal 10 a khungna chiah a ni - hun pek belhah Mobashir Rahman chu hnawhchhuah ni mah se East Bengal tan a pawi phak tawh lo.

East Bengal tan hrem vangin Lalchungnunga a inlan thei lo a, India coach hlui Stephen Constantine hnuaia hmun pawimawh changtu Jerry Lalrinzuala chuan minute 90 a khel tluan thung.

Inrinni zan inkhel ngaihven hlawhah Mumbai City leh Hyderabad FC chu 1-1 in an inhnehtawk a, Lallianzuala Chhangte khelhna Mumbai-in tun season-a league match 17 an khelh tawhah tlawm an la nei lo tluang zel.

Mumbai tan Lallianzuala Chhangte leh Lalengmawia Ralte (Apuia) ten inkhel bul an ṭan ve ve a, Lunglei tlangval Lianzuala hian goal khung theihna remchang nei mah se tun season-a league goal kua a khung tawh chu a belhchhah thei lo.

Minute 23-naah Mumbai-in goal an hlawh chhuak ta nge nge a, Lianzuala thawhchhuah a ni. Chennaiyin FC forward hlui hian ball a thlawh lut a, Bipin Singh chuan goal-ah a lo tauh.

Mahse, Nikhil Poojary chuan a kutin a lo dang a, referee-in penalty a pe zui - Jorge Pereyra Diaz chuan penalty hi harsatna nei loin goal-ah a chantir a, hnehna an chan mai pawh a rinawm hman hle.

Minute 65-na a ni a, thawnthu her dang-lamin a awm - Hitesh Sharma chuan kut ruak maia haw bik duh loin, Hyderabad tan si phurh sutna goal a khung a, 1-1 in inkhel a tawp.

Inrinni zan inkhel pakhat zawkah Jamshedpur chuan Ritwik Das leh Daniel Chima Chukwu goal hmangin, 2-0 in NorthEast United an hneh a, match 17 aṭangin point 12 an nei ve ta der.

Men of Steel tan hian Ricky Lallawmawma leh Laldinliana Renthlei ten inkhel bul an ṭan a, Highlander tan Laldanmawia Ralte chu bench aṭanga luhtir a ni bawk - danglamna erawh a thlen thei bik lo.