Spurs-in Arsenal lawmna an siam

Arsenal-in Inrinni zana Everton an hneh loh avangin an indawm kun a, amaherawhchu league match an khelh leh hma hauhin an nui leh thei ta. Pathianni zan khan Gunners hmelma Tottenham Hotspur chuan Premeir League champion lai Manchester City 1-0 in an hneh a, Mikel Arteta hote tan lawmna an siamsak.

Tottenham Hotspur Stadium-ah striker ropui Harry Kane a inlar a, England captain hian minute 15-naah goal awmchhun a khung. Minute 87-naah Argentine defender Cristian Romero hnawhchhuah ni mah se player 10-a khel chungin Spurs an ṭang tluan.

Goal khat chu

Man City-in nung takin inkhel bul an ṭan a, ball pawh an chang tam a, Spurs tlarhnung tan hna pawh an siam tam. Mahse, Pep Guardiola hote hian a hmawr an bawk thei lo a, Spurs erawhin City tihsual an hmang ṭangkai thung.

Minute 15-naah Rodri-a ball pek fimkhur tawk loh chu Spurs midfielder Pierre-Emile Højbjerg-a'n chang fuhin box chhunga a khalh luh hnuin Harry Kane tan a pe a, English striker hian vawi khatah goal-ah pet nghalin a hun ṭha a bawhpelh lo.

City player-te an chetsual theih nan Spurs-in pressure an pe ṭha a, striker class bik Kane an chelh rah an seng bawk. London club hian kum 2021 nipui khan Kane hi chelh loin Man City lamah kaltir se chuan an tlarhma hi tun aiin a bil ngei ang.

Pep a danglam mah mah

Thlasik bazar hun a zo a, Man City-in player langsar an la lut lo a, hming langsar Joao Cancelo an chhuah thung. Portuguese wing back hi Bayern Munich-ah a che ṭha nghal a, City lamin pressure an ngah phah.

Pep Guardiola erawhin a ze danglam tak a chhuah chhunzawm a, City player zinga hming langsar ber Kevin de Bruyne chu bench-ah a dah. Chutihrualin Spanish manager hian Erling Haaland bul a ṭantir a, tun hnaia che ṭha Riyad Mahrez bakah World Cup-a Argentina champion puitu zinga mi Julian Alvarez ten bul an ṭan bawk.

City hi an vannei tawk loa, Mahrez-a'n first half-ah crossbar a pet per. Chutihrualin an goal khung khawl Haaland erawhin ball ṭha a hmu lo. Norwegian striker Haaland hian Spurs box chhungah ball vawi khat mah a khawih lo a, goal shot a neih loh bakah vawi 27 chiah ball a khawih.

Haaland hi kum 2023-ah a la che ṭha tawk lo a, khualmuala Chelsea, Southampton, Man United leh Spurs an hmachhawn ṭumin goal a khung lo vek. City striker hian big six hming lem an pek zinga mi Spurs, Man United, Chelsea leh Liverpool te khualmuala an hmachhawn ṭumin goal a la khung lo a, league-ah goal 25 khung tawh mah se a famkim bik lo tih erawh a chiang hle.

Spurs an ṭha hrim hrim

Premier League bikah Man City hian Tottenham khelmualah result ṭha hlawhchhuah an harsat hrim hrim. Pep Guardiola hote hi Tottenham stadium thar league-a an tlawh hnuhnung paliah an chak lo vek a, goal pawh an khung lo.

Spurs hian City-in ball an keng thei tih hriain tlarhnung an tiphui ṭha a, tlarhma lam thlengin pressure an pe ṭha. London club hi an bet satliah lo a, Kane leh Son Heung-min te an kawl avangin counter attack-a nawr let dan an zawng ve reng bawk.

Inrinni zanah pawh hian counter attack hmanga goal dang khung thei tur an ni a, amahrawhchu Ivan Perisic-a ball pek chu Kane-a'n a tlawh pha lo chiah chiah. Chutihrualin tlarhnungah Cristian Romero a che ṭha a, Argentine defender hi hun tawp dawn hnaiah hnawhchhuah ni mah se tharum thawh hunah tharum a thawh chat chat zel a, Haaland meuh pawh a che thei lo.

Italian manager Antonio Conte an zai a, a naute a ho thei lo. Assistant manager Cristian Stellini hnuaiah Sprus an khel a, Italian manager hian London club hi a vawi hnih nan a chakpui. Nikum November 1 khan Spurs-in Champions League group match hnuhnung berah Marseille chu khualmualah Stellini hoin 2-1 in an hneh a, knockout stage an khelh phah.

Engtin zel?

Premier League nomawi inchuh boruak a nung thar hle. Tunkar tawpah hmahruaitu Arsenal leh champion lai Man City an chak lo a, pathumna Manchester United erawh an chak thung. Erik Ten Hag-a hote hian Arsenal an hneh loh avangin nomawi inchuh zingah tel ta chiah lo mah se tun kara thil thleng avang hian beiseina tlem an nei leh ang.

Chutihrualin nomawi inchuhtu diktak erawh Gunners leh Man City te an ni a, team pahnih hi February 15, Nilaini zanah an inhmachhawn dawn. Emirates stadium-a an inkhelh hma hian Gunners-in Brentford an mikhual ang a, Man City-in Aston Villa an mikhual thung ang.