Tottenham tana goal khung tam ber Kane

England captain Harry Kane chuan Pathianni zan khan Premier League champion lai Manchester City laka Tottenham Hotspur chakna goal a khung a, Spurs tana goal khung tam ber record siamna goal a ni bawk.

Kum 29 mi Kane hian Spurs tan goal 267 a khung a, Spurs legend Jimmy Greaves-a record goal 266 chu a khum. Greaves hi English striker ropui zinga chhiar tel a ni a, England-in kum 1966-a FIFA World Cup nomawi a chawi ṭum pawh khan squad-ah a tel. Inelna ṭantirhah Greaves hi England rinrawl ni mah se group stage-ah a inhliam a, final-a hattrick siamtu Geoff Hurst-a'n a hmun a rawn luahlan a ni.

Greaves hian Chelsea leh AC Milan tana a khelh hnuin kum 1961 khan Tottenham hi a zawm a, Spurs tan hian kum 1970 thleng khelin match 379 aṭangin goal 266 a khung. Kum 2021 khan Greaves hi kum 81 mi niin a thi a, a club khelhna hlui pahnih Tottenham leh Chelsea inkhelh hun nen a inrual chiah a, inkhelh hmain zahna lantir nan minute khat chhung ngawi rengin an ding.

English striker Kane chuan, "Football khel tawh zinga ropui ber zinga mi Jimmy Greaves-a record ka khum thei hi ka lawm hle," tiin a sawi. Kane hian kum 2011 khan Spurs tan a khel ṭan a, London club tan hian match 416 khel tawhin goal 267 a khung. Jimmy Greaves-a official twitter account kaltlangin Greaves-a chhungten Kane hi an lawmpui a ni.

Kane hian Spurs tan record siam mah se Premier League record erawh khum turin hun a la mamawh dawn. England captain hian Premeir League-ah goal 200 a khung tling chiah a, Wayne Rooney (208) leh Alan Shearer (260) te a la tluk lo.

Spurs striker Kane chuan, "Alan-a'n record khum tur ṭha tak a siam a, khum ngei pawh ka tum dawn. Shearer hian a en ka ring a, a lawm leh lawm loh erawh ka hre lo. Mahse, goal erawh ka khung zel dawn a, nuam pawh ka ti," tiin a sawi.

Kane hian tun season league match 19 aṭangin goal 17 a khung tawh a, Rooney goal khung zat bik hi chu tun season chung ngeiin a khum thei hial ang. Premier League legend Alan Shearer pawhin Kane-a goal khung lai hi a thlir a, twitter-ah, "Spurs tana footballer ropui Jimmy Greaves-a record i khum avangin ka lawmpui che a, Wayne Rooney nen i thlen chin kan lo thlir zel e. Premier League-a goal 200 khung thei zinga i tel thei hi i ti ṭha hle a ni," tiin a lawmpui thu a ziak.

Chutihrualin Premier League club 20 zinga club record goal scorer ṭheuh thlir chuan Kane hian tluk loh panga a nei. Everton legend Dixie Dean (383), Liverpool legend Ian Rush (346), West Ham legend Vic Watson (326), Wolves legend Steve Bull (306) leh Leicester City legend Arthur Chandler (273) te chu a tluk lo thung.