Basketball inelna lian ber a hnai

Tualchhung basketball inelna lian ber Mizoram Super League season 8 chu February 10, Zirtawpni aṭangin khelh ṭan a ni dawn, match hmasa ber atan Mission Veng Hotshots leh LB Associates Bungkawn an inkhel ang.

Inelna hi Dengṭhuama Indoor Stadium, Mualpuiah khelh tur a ni dawn a, kuminah hian a vawi khat nan Aizawl khawpui pawn aṭangin team an awm dawn. District qualifying aṭanga tling Champhai chuan inelna an hmachhawn dawn a ni.

Vawi li champion tawh Zarkawt BCA chuan an match hmasa berah Chanmari Vikings an tum dawn a, anni hi tun hnai MSL thununtu an ni. MSL season hmasa pahniha champion Khatla TBL chuan Champhai hmangin inelna bul an ṭan ang.

LB Associates Bungkawn leh Khatla South Barons te hmel thar an ni dawn a, anni hian inelna sangah eng ang taka team ṭha nge an nih chu fiah an tum dawn. Inkhel hi Zonet Rihnimah a chhuak dawn; Zonet pawt lo tan man chawiin YouTube (member only) lamah en theih a ni bawk ang.

MSL hi MBBA buaipui a ni a, kar liam ta mai khan Division 1 screening hmangin MSL9 khel tur an zawng fel tawh. Division 1 champion Nursery SC leh pahnihna VR4 te chuan season tharah Mizoram chhunga basketball inelna sang ber an khel ang.