Milan ngamtu Inter beiseina a la nung

Serie A hmahruaitu Napoli kal fawr viau mah se, an hnungah champion tumin Inter Milan an la kal ve zel. Pathianni zan khan Inter hian an hmelma AC Milan chu Lautaro Martinez-a goal khat hmangin 1-0 in a hneh.

Spezia mualah Napoli 3-0 in an chak tih hresa chungin Inter an inlan a, chak lo ni se la chuan Naples club hi an sang fal hle ang. Mahse, Inter hian an inkar chu point 13-ah an ti hniam leh hret a, champion a la puan theih chiah bik loh.

Inter an chak

San Siro Stadium chu Pathianni zan atan Inter Milan khelmual zawk a ni a, tunlai an khelh dan thlir chuan chak tura rinkai zawk pawh an ni. Simone Inzaghi-a nauten inkhel thunun viau mah se goal khat aia tam khung an harsat.

Chawlhlawk hma deuhin Martinez chuan corner aṭanga ball kal a tauh lut. Argentina international striker hian hun tawp dawnah Romelu Lukaku-a siamsak zeuh chu a khung bawk a, mahse offside vanga hnawlsak a ni thung.

Serie A season kal laia goal 12 khung tawhtu Martinez chuan, "World Cup champion kan ni a, chumi hnuah chuan thil hi a hlimawm zawngin ka thlir nasa ta hle. Inter tana captain armband ka hreng thei kha ka lawm a, lawmna tur dang pawh a tam.

"Kan lo sawi ṭhin tawh angin Milan khawpui chu a dum leh a pawl a ni. Argentina tana hlawhtlinna kan chan ang kha Inter Milan tan pawh hian chan leh ka duh," tiin a sawi a, hmahruaitu nen an inkar zau deuh tawh mah se an la beidawng lo.

Chhuanlam awm lo

Serie A champion lai AC Milan an che fuh hleithei lo, coach Stefano Pioli-a'n an tlar hnung pawp nasa lutuk thawm phui a tum a, player a thlan dan ti danglam mah se an la inrem phui thei chuang lo - an tan nomawi humhim sawi ngam a ni tawh rih lo ang.

Pioli chuan, "Ball kan chang tlem tih chu zep tur a awm lo, a chhan chu goal chhuah loa khelh theih dan kawng kan dap vang a ni. Coach chuan harsatna chinfel dan tur a ngaihtuah tur a ni a, kei pawhin chu thil chu ka tum a ni," a ti.

Milan hian first half chhungin 26% vel chauh ball an chang, inkhel pumpui khaikhawmnaah erawh 35% an chang. Goal khung turin target zawna pet an nei lo a, ball an chang tlemin Inter lam goal khung tum dan chu an hnapui ber a ni.

Simone Inzaghi enkawl Inter tan erawh lawmna tur zel a ni, tun hnai chawlh kar thum chhung Milan lakah ṭum hnih hnehna an chang thei. Inzaghi chuan, "Inrintawkna kan nei leh ta, Lukaku leh Marcelo Brozovic an lo kir tawh bawk," tiin a phur hle.

A chung berah Napoli

Inkhel dangah Napoli chuan Victor Osimhen-a goal hnih bakah, winger Khvicha Kvaratskhelia-a penalty hmangin Spezia chu 3-0 in an sawp a, Italian football inelna sang ber season kal lai thununtu an nihna an nemnghet.

Napoli striker Osimhen chuan, "Match zawng zawng hi a pawimawh vek a, hnehna chan hi a lawmawm. Tuna kan khelh ṭhat tluan ang hi chhawmnun reng kan tum tur a ni ang, hmabak erawh a la tam hle.

"Serie A hi league hautak tak mai a ni a, a awlsam dawn lo. Chuvangin a tawpa hlim ber nih kan duh chuan chawl loa kan beih a ngai, a pawimawh ber chu inbuatsaihna ṭha neih a ni ang," tiin a sawi.

Kum 24 mi Osimhen hi season tir lam khan hliam vangin a buai deuh, a dam fel hnuah erawh dan theih loh ang maiin a kaltluang - Serie A match 17 a khelh aṭangin goal 16 a khung leh der tawh; European club lian dangte chil ti puttu a ni mek.