Stephen Curry a inhliam

Golden State Warriors guard Stephen Curry chu Dallas Mavericks an hneh ṭumin a inhliam a, a khup hliam vang hian eng chena rei nge a chawlh dawn tih tak chu sawi theih a la ni lo.

GSW hian Dallas Mavericks hi 119-113 in an hneh, hnehna changin lawm viau mah se quarter thumna an khelh laiin an thiampuipa hi a inhliam, vawiina Oklahoma City Thunder nen an inkhelh hunah chuan a inlan thei dawn lo.

Kum 34 mi Curry hi tun season chu hliam vangin a buai ngun hle, a dar (shoulder) hliam vangin match 11 chhung inkhel thei loin a lo awm tawh bawk. Ani a awm loh chuan GSW tan result ṭha neih a harsa ṭhin.

NBA champion Golden State Warriors hi Western Conference table-ah pariatna an ni mek, playoff khel phak chinah chiah chiah an awm tihna a ni - an dinhmun a la him lo, regular season an khelh hmabakah insiamṭhat an mamawh hle.