Zarmawia'n MMA World Championship khel dawn

Mizoram State MMA Association (MISMA) fighter chhuanvawr, Chite Veng tlangval Zarmawia chuan MMA world championship a hmachhawn dawn a, India ram aṭanga he inelna hmachhawn tura thlan fighter paruk zingah a tel a ni.

International Mixed Martial Arts Federation (IMMAF) buatsaiha neih tur inelna hi February ni 11-18, 2023 chhung neih a ni dawn a, Serbia sorkar chuan IMMAF hi thawhpuiin, inelna hi an thleng dawn a ni - Zara hian February 9-ah Serbia hi a pan ang.

MMA promotional company lian ber UFC nen an thawhdun avangin IMMAF hnuaia inelnaten ngaihhlut a hlawh ṭhin a, amateur fighter tan chuan professional fighter ni tura kailawn pawimawh tak a ni - tun inelna pawh hi MMA tournament awm tawh zinga lian ber tur a ni a, ram 63 ngawtin inelna an hmachhawn dawn. MMA cage pawh a vawi khatna atan panga lai a ruala hman a ni dawn a ni.

Zarmawia hi Mizo fighter zinga world championship hmachhawn tur pathumna a ni a, India record siamtu niin lightweight leh welterweight-ah national champion ni lai a ni - a nep lo hle. Zara hi muaythai aṭanga inzir chho ni mah se SPES martial arts gym-ah Brazilian Jiu-Jitsu personal training kum hnih chhung a la tawh bawk.

LPS Pro Muaythai leh Mizoram Fight League-a champion lai Zara hi UMAI national muaythai professional tilte belt kawl mektu a ni bawk a, MMA-ah vawi 20 fight hmachhawn tawhin, vawi 18 a chak a, vawi hnih a tlawm - Mizoram chhung bikah chuan MMA leh Muaythai-ah hnehtu a la tawng lo!

Zara hi Mizoram sports minister Robert Romawia Royte chuan a training senso zawng zawng tumsakin, inelna a hmachhawn turah hian a sponsor bawk - MMA India chuan Zara hi sponsor bawkin, 411 fightwear leh Raymonds te chuan thawmhnaw lamah an sponsor bawk.Zarmawia'n MMA World Championship khel dawn