Club World Cup semifinal khel dawn

FIFA Club World Cup 2023 semifinal hmasa zawk chu zanin dar 12:30 hian khelh a ni dawn a, Saudi club ṭha Al-Hilal leh South American champion Flamengo an intawng dawn.

Al-Hilal hian second round aṭanga inelna hmachhawnin, Asia khawmualpui aiawha tel team hian African champion Wydad Casablanca chu hun pangngaiah 1-1 a an inhneh-tawkpui hnuin, penalty hmangin an pet chhuak.

Argentine coach Ramón Díaz chuan Al-Hilal hi a enkawl a, season hmasa khan Saudi Pro League-ah champion nomawi a chawipui - Al Hilal hian AFC Champions League 2021-ah nomawi an chawi bawk a, AFC Champions League 2022 final khelh a la nih loh avangin Asia aṭangin inelna hi an hmachhawn.

Al Hilal hian Colombia international Gustavo Cuéllar, Porto striker chhuanvawr ṭhin Moussa Marega, Peru tana vawi 90 inlan tawh André Carrillo, Flamengo forward hlui Michael leh South Korea international Jang Hyun-soo te ho an kawl a, an inringtawk khawp ang.

Hetihlai hian Flamengo hi Atletico Madrid defender hlui Filipe Luís, Chelsea centre back hlui David Luiz, Chile international Arturo Vidal, Brazil international Pedro, Brazil tana vawi 18 inlan tawh Gabriel Barbosa leh Brazil tana vawi 25 inlan tawh Everton Soares te ho kawltu an ni tih hriat a ṭha.