Real an tlawm; Barca an chak - champion rim a nam ṭan

Spanish champion Real Madrid chuan khualmualah 1-0 in Real Mallorca an ngam lo a, Real chak loh thu hre saa inkhel Barcelona an chak thung.

Real Madrid defender Nacho chuan an lamah a tilut a, Real tan Marco Asensio chuan penalty a hlah bawk si avangin khualmualah Madrid khaw club an tlawm. Barcelona-in Real an tlawm tih hre chungin Sevilla an mikhual a, mikhual team lakah 3-0 in an chak - Barca tan Jordi Alba, Gavi leh Raphinha ten goal khat ṭheuh an khung a, Catalan club chiang takin an chak.

Hetihlai hian champion beisei zinga mi Real Sociedad pawh Real Valladolid lakah an tlawm a, Cyle Larin chuan inkhela goal awmchhun a khung - Sociedad hian point 14 ngawtin Catalan club an thlau tawh.

A pawi vawng vawng

Real-in Pathianni zana an inlan hmain Barca chu point ngain an thlau sa tawh a, Carlo Ancelotti nauten champion nomawi kawl chhunzawm an duh chuan tlawm a thiang tawh lo. Mahse, minute 13-na lekah Real-in goal an chhuah nghal a, Mallorca striker Vedat Muriqi-a ball tauh chuan Real Madrid defender Nacho perin, Real goal-ah a lut daih!

Real-in na takin nawrlet mah se an beisei goal an hmu lawk thei lo. Minute 59-naah erawh Real hian chance duhawm an nei ta nge nge a, goalkeeper Predrag Rajkovic chuan Vinicius Junior a titlu. Referee-in penalty spot a kawk a, Real tan Asensio a lo pen chhuak. Mahse, Mallorca aṭanga inzir chhuak attacking midfielder hian goal-ah a chantir thei lo a, Serbia keeper Rajkovic chuan ṭha zetin a lo dang.

Aw, kar a hla!

Real Madrid hian 74% zet ball chang mah se a pawimawh ber goal an khung thei lo a, vawi 20 ngawt shot nei bawk mah se goal hmaah an hriam tawk lo - target zawna kal hi pakhat chiah a ni. Madrid khaw club tan striker chhuanvawr Karim Benzema chu hliam tenau vangin a inlan thei lo a, French striker tel loin Real tlarhma a hriam tawk lo tiin a sawi theih.

Hei tak hi Real tan chinfel a ngai - kum 35 mi Benzema chu rinrawl a la ni a, a kum a tam ve tawh miau avangin French striker hi hliam vangin tun season-ah a buai fo a, Real hian number 9 tia chhal theih striker ṭha an nei lo. Rodrygo leh Vinícius Júnior hi player ṭha pangngai tak ni mah se, khelmual sir lama hun hmang tam zawk an ni a, Real-in Benzema aiawh zo an neih loh an tuar chho zel niin a lang - February 8 zanah Club World Cup semifinal-ah Al Ahly an hmachhawn zui dawn.

Barca an thiam

Real chak loh thu Barca-in an hre sa a, an chak chuan point riat ngawtin an sang fal thei dawn tih an hria - hei vang hian Catalan club player-te an inthlahdah duh lo a, mikhual lakah ṭhat an chhuah duh lo.
Mahse, Barca hian awlsam tak erawhin goal an khung bik lo. Goal awm loa chawlhlawk hman a nih hnuah, minute 58-naah Alba chuan Franck Kessié siamsak chu goal-ah a chantir a, Gavi chuan minute 70-naah Raphinha siamsak a khung bawk.

Minute kua a liam a, Alba bawk a inlar - goal hmahruai khungtu hi a tawp kharna goal siamsaktuah a ṭang ve thung a, Raphinha khung tur a siamsak. Sevilla-in a chhanletna tur an nei lo a, 3-0 in Barca an chak.
Barcelona chak mah se, chanchin lawmawm lo an nei tel a, captain Sergio Busquets chu hliam vangin lakchhuah a ngai - Catalan club hian February 12 zanah Villarreal an hmachhawn ang a, February 16 zanah Europa League knockout round khel turin Manchester United an mikhual ang.