Bayern-in Cancelo an ṭhatpui zel

Bayern Munich chuan Joao Cancelo an lakluh hnuah result ṭha an nei chho leh ta a, kar laihawl khan DFB Pokal-ah Mainz 4-0 a an sawp hnuin Pathianni zan khan Wolsburg 4-2 in an hneh. Bavarians hian point thum hlu tak an hmuh zarah point 40 an hmu a, Union Berlin aia point khata hmu tamin Bundesliga hmahruaitu an ni.

Volkswagen Arena-ah mikhual Bayern-in bul an ṭan ṭha a, Kingley Coman-a'n minute 14 chhungin goal hnih a khung nghal a, goal hnuhnung zawk hi Cancelo siamsak a ni. Minute 19-naah Joshua Kimmich-a cross chu Thomas Muller-a'n tauh goal a, Muller hi goal hmasa ber luh theih nan a inrawlh bawk.

Bayern-in goal khung rang mah se tlarhnung erawh a pawp hle. Wolsburg-in Jakub Kaminski hmangin minute 44-naah siphurh an sut ṭhen. Second half minute 54-naah Joshua Kimmich a fimkhur tawk lo a, Wolves nawrlet tur tihtawp nan Maximilian Arnold a titlu - Bayern hian a vawi hnih nan yellow card a hmu a, hnawhchhuah a ni.

Bayern-in player 10-a khel chungin goal an khung a, Jamal Musiala-a'n thui tak a khalh hnuah a pet goal. Bavarians hi khel ṭha chhunzawm mah se tlarhnung erawh siam ṭhat a ngai tih a lang. Minute 80-naah Mattias Svanberg-a'n Wolsburg goal hnihna a khung a, result erawh a danglam phah lo.