Navas-a'n Forest chakpui nghal

Keylor Navas chuan a team thar Nottingham Forest tan Pathianni zan khan a match hmasa ber a khel a, an lama goal lut tur ṭha tak taka dangin a team hi Leeds United lakah 1-0 in hnehna a chan pui.

Forest tan hian Brennan Johnson chuan minute 14-naah inkhela goal awmchhun hi a khung, tun season kal laiah Johnson hian Premier League goal nga a khung tawh a, a team hi season thara inelna sang khel zel thei turin dinhmun ṭhaah a dah mek.

Paris Saint-Germain aṭanga an lakluh keeper Navas-a'n Luke Ayling leh Wilfried Gnonto te khung tur chu ṭha takin a dansak a, hei bakah hian tlarhnung aṭangin ball a sem chhuak ṭha thei hle. Forest hi an keeper Dean Henderson inhliam mah se Navas an lakluh avangin goalkeeper-ah buaina an nei lo - an ṭha sawt zawk!

Nottingham Forest manager Steve Cooper chuan, "A nihna tak sawi chuan first half bik kha chu mimal chet ṭhat rah kan seng. Brennan-a goal khung a ṭha em em a, chumi ang chiah chuan Keylor khan kan lama lut tur a dang bawk," a ti.

League match 21 an khelh tawh aṭangin Forest hian point 24 an hmu a, table-ah 13-na dinhmun an luah mek. Tla thei china awm Everton nen an inthlauhna chu point ruk a ni a, season tharah EPL khelh zel an tum dawn.