Pahnihna Marseille hnehtu Nice

Ligue 1 match 10 chhung tlawm loa kaltluang tawh Marseille chu Nice lakah 3-1 in an chak lo a, an chunga awm Paris Saint-Germain an phak lohna chu point riat zetin a zau ta.

Pathianni zan inkhelah Marseille hian an player man to ber, euro maktaduai 32 senga an lakluh Vitinha chu inkhel bul an ṭantir a, goal erawh a keng tel nghal lo - mikhual Nice lamin Sofiane Diop leh Gaetan Laborte te hmangin chawlhlawk hmain hma an hruai.

Tun hnaia khel ṭha tluang tak Marseille lamin, minute 60-naah Ruslan Malinovskyi hmangin si phurh an sut ṭhen a, beiseina nei sang viau mah se Nice bawkin hun tawp hma deuhin Billal Brahmini hmangin an khung belh.

Marseille coach Igor Tudor-a'n danglamna thlen a tum viau, Vitinha leh Dimitri Payet te la chhuakin Alexis Sanchez leh Ruslan Malinovskyi te an lut thung a, an game nung hret mah se an tum ram an thlen phah thei ta chuang lo.

Nice hian Arsenal midfielder hlui Aaron Ramsey, Leicester City tana Premier League nomawi chawi tawh Kasper Schmeichel leh kum bithliah hrang hranga France aiawh phak Khephren Thuram te an nei a, khualmuala hnehna chang turin an ṭha tawk viau.

Marseille an chetsual takah chuan PSG chu champion chiang tura sawi ngam a ni leh ta a, pahnihna Marseille hi a hnuai chiaha awm Lens nen an point a inzat, palina AS Monaco nen an inkarah pawh point hnih chauh a awm, an dinhmun hi inthlak kual thei reng a la ni.