Zaninah Mizoram Fight Night final
GIG Motors Mizoram Fight Night chu zanin dar 8:00 hian Dawrpui Multipurpose Centre-ah a hmawr bawk a ni dawn. Final pariat thlir tur a awm dawn a, boxing ngainatute tan chuan zan duhawm bik a ni.
Fight Night final en man hi Rs 100 leh Rs 200 a ni a, Zonet Rihnim leh Zonet YouTube (Members Only) hmangin in lam aṭangin a en theih bawk ang. Chutihrualin veng leh veng, khua leh khua inbeihna a nih tawh avangin boxer-tin ten ṭantu an ngah dawn a, inhnek boruak a san phah khawp ang.
Final hma
Aizawl District Boxing Association leh Zonet buatsaih Mizoram Fight Night hmawr bawknaah hian chief guest leh guest of honour-te an awm dawn a, Mizoram sports minister Robert Romawia Royte chu khuallian a ni dawn.
Inelna main sponsor GIG Motors CEO John Lalpeka chu khual zahawm a ni dawn a, inhnek ṭan hma hian thu a sawi ang. Mizo Idol 2022 T. Vanlalhmangaihi leh pathumna David Darlong te an zai dawn bawk.
Final chu
Semifinal aṭangin round nga an inhnek tawh a, a thiam lo zawk tan vanneih a har tawh. Final-ah pawh round nga an inhnek dawn a, inhnek pariat a awm dawn.
Mipa inelna bik category hi panga a awm a, hmeichhe category pathum a awm bawk. Final hi a hmuhnawm dan tur indawta ngaihin rem a ni a, chutihrualin a hmuhnawm dan tur indawt tak erawh hriat lawk theih a ni lo. Champion zawnna a nih tawh avangin a hmuhnawm vek tawh ang.
Mipa bout nga inhnek tur chu
52 Kg: Lalzaenpuia vs HC Rama
Siaha District Niawhtlang tlangval Lalzaenpuia hi Ramhlun Venglaiah a awm a, MIZBA Boxing Hall-ah a training ṭhin. Mahni inluaha eizawng a nih avang leh hnathawh avangin boxing lamah a hun pum a pe thei lo a, chutihrualin 2016 LPS ProFight-ah khan tel tawhin pool champion ni phak a ni.
A hmachhawn tur HC Rama hi Niawhtlang tlangval tho a ni a, ani hi Durtlang Leitanah a thleng mek. Boxing championship-ah a vawi khat telna a ni a, MIZBA Boxing Hall-ah a training ṭhin. Chhun lamah hnathawk pahin training hun a insiam chawp a, boxing tana a inpekna hi a hlu hle.
57 Kg: Laldinmawia vs Franky H. Vanlalruatpuia
Tuipui tlangval Laldinmawia hi Tuikual North-ah a awm mek a, boxing-ah sulhnu ṭha tak a nei. 2011 LPS ProFight champion a ni a, 2012 Mizoram ContenderFight champion a ni a, boxing thiam vangin Indian Navy-ah hna hmuin India tan pawh medal la tawh a ni.
Lunglei Salem Veng tlangval Franky H. Vanlalruatpuia hi Lunglei SAI aṭanga inzir a ni a, state championship-ah gold medal a lak tawh bakah Khelo India-ah silver medal la tawhid National School Games-ah bronze a la tawh bawk. Dinmawia hian sulhnu nei ṭha mah se boxer naupang zawk Franky hi dah hniam a rem lo.
75+ Kg: Johan Vanlalrema vs F. Lalthanliana Jr
Tuirial tlangval Johan Vanlal-rema hian state championship-ah gold medal a la tawh a, kum 2019 aṭang khan MSSC hnuaia Hawla Indoor-a boxing zirnaah a inzir ṭan. Sulhnu ṭha tak la nei lo mah se a khingpui tur F. Lalthanliana Jr pawhin sulhnu a la ngah bik lo.
Lunglei Electric Veng tlangval Lalthanliana hi Khatlaah a awm mek a, Inter District-ah gold medal a la tawh. Zanina inhnek tur zingah weight rit ber an ni a, an hnek pawh a na tham tawh hle.
63 Kg: Lallawmawma vs Lalnunzira
Tuipui boxer Lallawmawma hi SAI-ah a awm mek a, National Games hnuhnung berah bronze medal a lak phak avangin a theihna a sang tih a chiang. Lawmawma hi NE Olympic-ah khan gold medalist a ni a, National School Games-ah gold a lak tawh bakah Junior National-ah bronze medal a la tawh bawk.
Haulawng tlangval Lalnunzira hi Ramhlun South-ah a awm mek a, Mizo boxer hmabak nei êng pahnih an inhnek dawn, tiin a sawi theih. Zira hian National School Games-ah kum 2018 khan gold medal a la tawh a, State Championship-ah gold medal a lak bakah nikuma neih NE Olympic-ah khan silver medal a la bawk.
69 Kg: Malsawmkima vs Zochhuanawma Fanai
Final bout pariat zinga hmuh-nawm ber tura Malsawmkima leh Zochhuanawma Fanai an ngai hi a mak a hran lo. Nikum kum tawpa neih National C'ship-ah MIZBA-in sum an neih loh avangin SAI an tir a, NE Olympic-a gold medalist Zochhuana aiin SAI boxer Malsawmkima a kal ta zawk. MIZBA thutlukna a sual em tih chu zaninah a hriat ang.
Muthi tlangval Malsawmkima hian NE Olympic-ah silver medal a la tawh a, final thleng tur hian LPS ProFight champion ni tawh Lalrinawma (Agoa) a hneh. Republic Veng tlangval Zochhuanawma Fanai hian BFI East Zone 2020, NE Olympic 2022 leh State C'ship-ah gold a la vek tawh a ni.
Hmeichhe bout pathum
51 Kg: Lalrinchhani Pautu vs Lalremsiami
ITI Veng nula Lalrinchhani Pautu hi Junior National Boxing C'ship-ah ṭum hnih a tel tawh a, NE Olympic hnuhnung berah khan silver medalist a ni.
Lunglei Rahsi veng nula Lalremsiami hian state level-ah gold medal 12 a la tawh a, silver pali leh bronze pathum a la tawh. NE Olympic-ah bronze medal a la a, Rinchhani nen hian an intum tawk viau tura ngaih a ni.
57 Kg: TC Lalremruati vs Ruthi Lalhmingṭhai
ITI Veng nula TC Lalremruati hi Mizoram Excise Department a thawk lai a ni a, boxing-ah sulhnu a nei ṭha. Remruati hian national-ah silver a lak tawh bakah NE Games-ah gold medal a la tawh a, NE Olympic hnuhnung berah khan silver medalist a ni.
Reiek nula Ruthi Lalhmingṭhai hi SAI Mission Vengthlangah a awm mek. Junior national-ah bronze medal pahnih a la tawh a, Youth national-ah bronze medal la tawh bawkin NE Sports week-ah silver a la tawh bawk. An record thlir pawhin an intluk tawk dawn tih a chiang.
60+ Kg: Lalbuatsaihi vs Rudy Lalhmingmuani
Lalbuatsaihi hi Bethlehem Vengthlangah a awm a, tun ṭum hmeichhe boxer zinga langsar bera chhal ngam a ni. BS-i hi boxing thiam vangin SSB-ah a thawk mek. India aiawhin Nation Cup 2015 Serbia-ah a tel a, kum 2019 khan China-a World Police Games-ah gold medal a la a, kum 2021 khan Dubai-ah Elite Asian Boxing C'ship silver medal a la bawk.
BS-i khingpui tur Lawngtlai Chandmary nula Rudy hian sulhnu a nei ṭha ve tho a, chak tur a chiang lo. SAI Mission VT-a awm Rudy hian kum 2020 khan India aiawhin Golden Girl Boxing C'ship-ah silver medal a la. National C'ship-ah pawh kum 2019 khan bronze medal a la tawh a, NE Olympic hnuhnung berah leh All India Inter SAI 2018-ah gold medal a la thei a, kum bithliah inelnaah national level-ah medal a la nual tawh bawk.
