Mizoramah Reliance Development League

Mizoram Football Association leh Reliance Foundation ṭangkawp chuan Reliance Foundation Deve-lopment League chu Mizoramah an buatsaih dawn. Kum 21 hnuai lam player-te inelna niin India rama a tiṭhate tan English Premier League club-te nena inkhelhna hun a inhawng ang.

MFA chuan he inelna hi March thla tirah Aizawlah khelh turin a ruahman a, team paruk tan a tel theih ang.

Team tel duh tan

Reliance Foundation Develop-ment League-ah hian MFA leh District Football Association hnuaia registered club tu pawhin tel dilna thehluh theih a ni a, Mizoram Premier League club ni kher lo tan pawh tel theih a ni.

Dilna form hi MFA Office, City Park-ah February 8, 2023 aṭangin Rs 100 pea lak chhuah theih a ni a, February 10, Zirtawpni tlai dar 4:00 hmaa thehluh tur a ni.

Tute nge khel thei?

Reliance Foundation Develop-ment League hi Under 21 inelnaa kalpui tur a ni a, chutihlaiin Under 23 player pathumte playing XI-ah an tel thei thung ang.

Under 21 player hi January 1, 2002 leh chumi hnu lama piang chin pawm an ni a, Under 23 player-ah hian January 1, 2000 leh a hnu lama piang chin an tel thei ang. Kum dik taka kalpui tur a ni a, original birth certificate endik tur a ni ang.

Squad-ah hian mi 40 aia tam lo ziah luh theih a ni a, Under 23 player hi 10 aia tam an awm thei lo a, inkhelh niin (match day squad) mi panga ziah luh theih niin, pathum aia tamin a rualin an khel thei lo thung.

Inkhelh dan tur

Team parukte hi ṭum hnih an inkhel kual chhuak dawn a, a tawpa a tiṭha pahnihin National Championship an khel thei ang.

India ramah hmun pakua thlan bikah he inelna hi khelh a ni dawn a, hei hi 'National Qualifiers' tia dah a ni. Hmun hrang hranga a tiṭha team pahnih ṭheuh hian National Championship an khel ang a, India rama club tiṭha palite hi international tournament-ah an khel ang.

Reliance Foundation Develop-ment League-a a tiṭhate tan hian an kal zelna turin international tournament Next Generation Cup siam a ni a, hei hi Premier League leh Indian Super League ṭangkawpin an buatsaih a ni.

Kum 2022 khan Next Generation Cup-ah hian Reliance Foundation Development League lama tiṭha pahnih Bengaluru FC leh Kerala Blasters-te an khel a, Premier League aṭangin Tottenham Hotspur, Leicester City, West Ham, Crystal Palace leh Nottingham Forest academy-te nen an inkhel. Kum 2020 khan Manchester United, Chelsea leh Southampton academy-te pawh an lo inlan tawh - Mizo club tan hun ṭha a ni e.