Old Trafford-ah manager nei lo Leeds lenglut dawn

Zanin dar 1:30 hian Manchester United-in Old Trafford-ah Leeds United an mikhual dawn. Leeds hian manager Jesse Marsch chu tun hnaia result an neih ṭhat loh avangin an ban a, zanin hian coach pathum Michael Skubala, Paco Gallardo leh Chris Armas ten Whites hi an enkawl ang.

Man Utd an chungnung

Kum 2000 chhoah Man United leh Leeds hi an inel tawk ṭhin a, club pahnih hi an inhal em em bawk. Chutihrualin Sir Alex Ferguson hnuaia Man United vanglai a nih avangin Premier League-ah Red Devils hi an chungnung zawk.

Man United hian vawi 16 hnehna an chang a, vawi riat team pahnih hi inhnehtawkin Leeds hi vawi li chauh an la chak. Old Trafford-ah phei chuan Leeds hian chak hmel an la hmu lo a, vawi 14 an inkhelh tawhah vawi 10 an chak lo. Chutihrualin vawi li an inhnehtawk a, Leeds hi chak zo lo pawh ni se point khat an hmu a nih chuan Erik ten Hag-a hoten point hnih hloah an inngai ang.

Rashy vullai

Manchester United striker Marcus Rashford hian a vanglai hun a hmang mek a, Old Trafford-a Premier League match hnuhnung parukah goal a khung vek. Kum 2012-a Wayne Rooney-a'n Old Trafford-a match ruk goal a khung zawn hnuah Rashy hian a rawn ti leh thei a, a vanglai hun a hmang tih loh rual a ni lo.

English forward Rashford hi mual vei lam kil aṭanga a hlauhawm rualin striker hna chelh tur pawhin a rintlak ta hle. Crystal Palace 2-1 a an hneh ṭumin Wout Weghorst chhuah hnuah Rashford hian striker hna a chelh a, awmna hmun taka a awm rah sengin goal pawimawh a khung.

Sabitzer-a tan hun ṭha

Eagles an hmachhawn ṭum hian Casemiro hnawhchhuah a ni a, Brazilian midfielder hi match thum a khelh thei dawn lo. Man United hian hliam vangin Scott McTominay an la chhawr thei lo a, hliam vang thoin Christian Eriksen-a'n hun rei zawk a khel dawn lo.

January transfer-ah loan hmangin Bayern Munich aṭangin Marcel Sabitzer an lalut a, Palace lakah hian Austrian midfielder hi inkhel chawhnu lamah a inlan. United keeper David de Gea chuan, "Casemiro tel lo hi a harsa dawn a, mahse kan squad a chhah. Palace lakah Sabitzer-a'n an inpeih tih a pholang a, tawnhriat a nei ṭha bawk," tiin a sawi.

United hian hliam vangin player ṭha ṭhenkhat chhawr thei lo mah se tlarhmaah phei chuan Ten Hag-a'n duh thlan tur player a kawl - Jadon Sancho a inkhel thei tawh a; Rashford, Weghorst, Antony, Anthony Martial leh Alejandro Garnacho te an awm a ni.

Leeds ve thung

Leeds United-in league ṭantirh match thumah vawi hnih hnehna an chang nghal a, hemi hnu hian match hnih chauh an chak. November 5-a Bournemouth an hneh hnuah Leeds hian chak hmel an hmu leh tawh lo a, table-ah pawh 17-naah awmin tla thei dinhmuna ding Everton nen point 18 ve ve an hmu.

Hemi a nih avang hian Leeds-in nikum Ferbuary thlaa an lakluh manager Jesse Marsch an ban hi a mak hran lo a, American manager rual hian coaching staff zinga mi Rene Maric, Cameron Toshack leh Pierre Barrieu an chhuak bawk.

An striker Rodrigo chu inhiam vangin Man United lakah an chhawr thei lo a, chutihrualin Patrick Bamford a dam tawh. Nottingham Forest an hneh loh ṭuma hrem vanga inlan thei lo Robin Koch an chhawr thei dawn bawk a, Man United tan fimkhur a ṭul ang.

Premier League-ah team tinin an khelh tur zat chanve aia tam an khel tawh a, club tin hi vawi hnih zel an inhmachhawn dawn. Leeds leh Man United te hi February 12, Pathianni hian Elland Road-ah an inkhel lehnghal dawn a, manager tan pawh game plan siam thiam a har phah ang. Man United-in February 16, Ningani zan hian Europa League-ah Barcelona an hmachhawn dawn a, Leeds erawh Europe inelnaa an tel loh avangin player siksawi chungchangah buaina an nei ve lo ang.