Joshua a lo kir dawn

British heavyweight boxer rothap Anthony Joshua chu April 1 khian ring chhungah a lo kir leh dawn ta a, 02 Arena, London-ah Jermaine Franklin nen an inhmachhawn ang.

Kum 33 mi Anthony Joshua hi a inhnek hnuhnung lamah a ropui lo hle - vawi 22 zet a khingpuite a hneh vek hnuah, June 2019 khan Andy Ruiz Jr. lakah a tlawm a, WBA (Super), IBF, WBO leh IBO heavyweight title a hloh.

December 2019 khan Andy Ruiz Jr. lakah hian hnehna changin, a kawnghren hloh tawh a nei let a, December 2020 khan round kuanaah Kubrat Pulev chu knockout-in, a kawnghren hi a humhim bawk.

Mahse, September 2021 khan Oleksandr Usyk lakah a kawnghren a hloh a, August 2022-ah intum nawn leh mah se split decision-in a tlawm zawkah puan a ni leh ta tho.

Joshua chuan, "Ring chhunga lo kir leh ka châk tawh takzet a, rilru leh taksa a inpeih thlap tawh e. Ka khingpui tur hi a ṭhat avangin, fight hmuhnawm tak phochhuah a, ka coach tihlungawi ka tum ang," a ti.

Vawi nga inhnek a hmachhawn hnuhnunga vawi thum tlawm Joshua chuan, "Franklin hi a rilru puthmang a dikin, a style pawh a ṭha a, chu chu a fight hnuhnung hoah khan kan hmu nual a ni," a ti a, a hmachhawn tur chu a fak hle.

Kum 29 mi Jermaine Franklin hian vawi 22 fight hmachhawn tawhin, vawi 21 a chak a, a fight hnuhnung berah Dillian Whyte ngam loin a tlawm.

Franklin chuan, "Heavyweight division sang bera ka awm a hun ve tawhzia khawvel hmaa lantir turin ka inpeih tawh. Joshua hun chu a ral tawh a, khawvel ka barakhaih hun a thleng ve ta," a ti a, a inringtawk hle.