Swiatek dinhmun a la nghet tawk

Hmeichhe tennis thuneitu sang Women's Tennis Association (WTA) chuan world ranking thar an ti chhuak a, a chung berah Iga Swiatek chu tuma chuh buai phak lohin a la awm zel - el phak an la awm lo.

Polish nula Swiatek hian nikum April 4 aṭang khan world number 1 dinhmun hi a luah, a chung bera a awm hnuah tumah in an la pawtthla thei lo, tun dinhmunah amah hnaih bertu Aryna Sabalenka aiin point 4000 chuangin a sang zawk.

Australian Open-ah khan Swiatek hian beisei a phak lo, tun kar hian Qatar lamah inelna a hmachhawn dawn a, result ṭha a neih theih tawh a rinawm. Ranking sang zual 20 chingah danglam a awm lo.

World number 5 Caroline Garcia chuan a chunga awm Jessica Pegula tlan pelh theihna remchang a nei, amaherawhchu Pathianni zan khan Lyon Open final-ah a chak lo a, a hun ṭha neih a bawh pelh.