Irving-a'n Nets aṭangin Mavericks a pan

Kyrie Irving chuan a dil ang ngeiin Brooklyn Nets a chhuahsan a, a team thar tur chu Dallas Mavericks a ni. Mavericks tan hian jersey number 2 a ha dawn a, a match hmasa ber a khelh ṭan theih hun tur erawh tih chian a la ni lo thung.

Cleveland Cavaliers tana NBA nomawi chawi tawh Irving hian Brooklyn Nets tana a contract zo mai tur a pawtsei duh lo, tun hnai kha Nets hian a inkhelh loh chhan chu damloh vang tiin sawi mah se, club aṭanga chhuah a duh vang tih a hriat.

Team pahnih inrem dan chuan - Dallas hian Kyrie Irving leh Markieff Morris te an chang. Brooklyn lamin Spencer Dinwiddie leh Dorian Finney-Smith te an neih bakah, 2027 second-round pick, 2029 first-round pick (unprotected) leh 2029 second round-pick te an nei tel thung.

Dallas Mavericks coach Jason Kidd chuan, "Irving hian theihna sang bik a nei a, kan team lamin kan mamawh ang chu a rawn keng thei ang. A khelh tawhna hmuna hlawhtling ṭhin a ni a, keini pawh min champion pui thei ang," a ti.

Irving hi pa thuduh ve tak a ni a, hripui leng Covid-19 laka invenna vaccine a lak duh loh avangin NBA match ṭhenkhat a khelh theih loh phah tawh, 2021-22 season khan March thla thleng chu anmahni khelmualah a inkhel ve thei lo.

NBA kalphungah chuan, team zawng zawng ngaihdan a inang vek lo. An khawpui awmna thuneitu ten an tih dan angin an kal mai ṭhin; Nets awmna New York khawpui inkaihhruaina anga an kal a ngaih vang a ni.

Kum 30 mi Irving hi Los Angeles Clippers, Los Angeles Lakers leh Phoenix Suns te nen pawh sawizawm a ni. Western Conference table-a pangana Mavericks tan Irving an chang thei hi chanchin lawmawm a ni thei ang.