FIFA Club World Cup: Zaninah Real an inlan dawn

Khawmualpui champion inelna, FIFA Club World Cup semifinal-ah zanin dar 12:30 hian Real Madrid an inlan dawn a, Al Ahly nen final luh an inchuh dawn.

Al Ahly hian first round aṭanga inelna hmachhawnin, match hnih an khelh tawhah an chak ve ve a, Real Madrid hmachhawn hi an châk ang - an hneh theih ngat chuan an club chanchina thil thleng ropui ber pawl a ni dawn.

Hetihlai hian Real Madrid erawh tun hnaiah result an nei ṭha lo hle. La Liga-a an match hnuhnung pathum aṭangin point li chiah an hlawh chhuak a, match hnuhnung berah Real Mallorca chu 1-0 in an ngam lo.

Real-in fan-te rilru na thawidam nan chak an mamawh a, an mualpho khuh nan Club World Cup-ah champion an mamawh - zaninah thapui thawhin an khel ang.

Mahse maw...

Real tan chak a ṭul a, mahse, Madrid khaw club hi an ṭhat dan berin an inlan thei dawn lo. Ferland Mendy (malpui), Eden Hazard (khup) leh Lucas Vazquez (kerek) te chu hliam vanga inlan thei lo tur chiang an ni.

European champion tan anni pathum awm lo hi chu a tawrh dam theih mai a, mahse, Real Mallorca nen an inhmachhawn hmaa warm-up na lama inhliam goalkeeper Thibaut Courtois pawh a inlan theih a rinawm lo - hei hi a pawi thei.

Eder Militao (ṭhal) pawh hliam vang thoin a inlan thei dawn lo a, Real Mallorca laka a tel lo tih hriat tak Karim Benzema chu malpui hliam vangin a la inlan dawn lo bawk.

Real tan Courtois leh Benzema an inlan dawn loh chuan, Al Ahly tan hna a awlsam sawt dawn tihna a ni a, Egyptian club ṭha hian beiseina an neih phah ang.

A pawimawh

Real tan zanina chak hian pawimawhna tam tak a nei - La Liga table-ah point riat zetin Barcelona an phak lo mek a, Champions League last 16-ah Liverpool an hmachhawn dawn bawk.

Copa del Rey-ah semifinal lut mah se Barcelona an hmachhawn dawn avangin final a chiang lo a, Spanish Super Cup final-ah Catalan club hi an lo ngam lo tawh bawk a, Xavi enkawl Barca-in an ropuina an chhuhsak mek.

Hei vang hian Real tan zaninah chak a pawimawh a, coach Carlo Ancelotti-a'n Courtois tel loa goal venhim a, Benzema tel loa goal khung dan a ngaihtuah a ṭul.

Mahse, Italian coach hi Champions League nomawi ringawt pawh vawi li lo chawi tawh a ni a, Al Ahly laka hnehna chan dan tur tawk chu a hre tura ngaih a ni - zaninah a chiang dawn.

Al Ahly zinkawng

Mizo football ngainatu tam zawkin Al Ahly hming kan hriat vawi khatna a ni hial mai thei - a awm lo hran lo. Egyptian club-in Club World Cup an khelh dante hi an vannei hle.

CWC-ah hian khawmualpui champion ṭheuh bakah inelna thlengtu ram league-a champion-te an inlan ṭhin. Tun ṭum inelna hi Morocco-in an thleng a, an ram league champion Wydad Casablanca chu African champion an ni tel bawk.

Wydad hian African champion an nihna anga inelna hi an hmachhawn tho avangin, league kaltlanga an hmun ruak chu CAF Champions League final-a an hneh tak Al Ahly hian an chang.

Al Ahly an che fuh chhunzawm - first round-ah Oceania champion Auckland City an hneh a, second round-ah MLS club ṭha Seattle Sounders hneh zuiin, semifinal hial an lut ta daih.

An ṭha em?

Al Ahly hian Egyptian Premier League-ah hma an hruai mek a, CAF Champions League-ah ringawt vawi 10 champion tawhin, anni aia champion hnem an awm lo - European champion ni ngun ber Real (14) nena an inkhel tur hi en a châkawm hle.

Egyptian club enkawltu hi Marcel Koller niin, Swiss club ṭha Grasshoppers, German club VfL Bochum leh Austria thlengin a lo enkawl tawh a, a tawnhriat hi Real laka a team chakpui nan a ṭha tawk.

Mali international defensive mid-fielder Aliou Dieng hi Real goal nawr tur chhut chah nan hman an tum dawn a, Brighton & Hove Albion forward hlui Percy Tau, Egypt international Mohamed Sherif leh attacking midfielder Abdel Kader te chu goal nawrna kawngah an ṭangkai ang.

Goalkeeper Mohamed El Shenawy hi si ban nghak turin a ṭha tawk a, ani venpui turin Egypt international Mohamed Abdelmonem leh Mahmoud Metwalli an awm bawk - inkhel hmuhnawm a beisei ngam.