Lazio an chak zo lo

Champions League khelh tum Lazio chu Thawhṭan zan khan an chak zo lo, an mikhualna ramah Lazio hi Verona nen 1-1 in an inhnehtawk, an elpui club dang kalsan theihna remchang an bawhpelh rih a ni.

Kar tawp inkhelah Atalanta leh AC Milan te a chak lo, an elpui club pahnih an tlawm tih hresa in Lazio an inlan. Chawlhlawk hma chiahin Pedro hmangin hma an hruai a, an dinhmun an siam ṭha hman viau.

Mahse, team talbuai Verona lamin second half tir lamah Cyril Ngonge hmangin an sut a, goal dang lut zui tawh lohin point khat ve ve an insem - Verona tan point hmuh belh hrim hrim a lawmawm zual ang.

Lazio manager Maurizio Sarri chuan, "Kan sawi lawk ang ngeiin inkhel awlsam a ni lo. Hellas khan inkhelh chhung zawngin min chhaih buai hle, chutih rualin keini lam khan hmachhawn dan kan thian ve bawk.

"Second half tir lam minute 15 chhung vel kan khel ṭha tawk lo, a bak chu kan hna kan tlin viauah ka ngai. Chak lo turah hian ka indah sa ngai lo, chutih rualin hnehna chang tur chuan minute 90 chhung thapui kan thawh a ngai thung.

"Ka naute an thawh-hona a ṭha thei em em a, chutih rualin kawng ṭhenkhatah hmasawn kan la ngai. Champions League khelh tum tan chuan point hloh zeuh zeuh hi a tawpah a pawi thei, chuvangin inthlahdah a remchang lo," a ti.

Lazio hian Serie A match 21 aṭangin goal 17 chauh an la chhuah a, anmahni aia chhuah tlem chu hmahruaitu Napoli chauh an ni. Naples club hian goal 15 an chhuah thung, an tlarhnung phui hi ni dangah chuan an chakna hnar a ni ṭhin.