Curry tel loin Warriors an chak

Golden State Warriors guard Klay Thompson-a'n basketball thiam bik a nihzia a lantir a, an player pawimawh Stephen Curry chhawr thei lo mah se Warriors hian Oklahoma City Thunder chu 141-114 in an hneh.

Nimin zing San Francisco-a inkhelah Thompson hian 3-points ringawt pawh vawi 12 a nei thei a, a pumpuiah point 42 zet neiin a thawhhlawk hle. Ani bakah hian Jordan Poole che che fuh bawkin assist vawi 12 a rawn nei a, ani hian match khata assist a neih hnem ber ṭum a tawng.

An match hnuhnung zawk an khelh ṭumin Curry chu a khup a hliam. NBA champion hi season kal laiah an che ṭha tawk lo a, playoff khel ngei turin an dinhmun a la him bik lo, hun harsa an tawh mek laiin Thompson a inlar chu an vanneihpui.

Inkhel dangah Chicago Bulls chuan San Antonio Spurs 128-104 in an hneh, hnehna an chan theih nan Nikola Vucevic chuan double-double (22 points & 12 rebounds) a nei a, player pasarih ngawtin point 10 an nei tling.

Bulls hi a zawnin vawi thum an chak ta a, chak lo San Antonio erawh tun hnaiah a zawnin match kua ngawt an tlawm a - Western Conference table lamah a hniam ber dawt dinhmun an luah, an awmna a ṭha lo hle.

Season duhawm hmangtu Boston Celtics an kang sang zel. Eastern Conference hmahruaitu Boston hian Detroit Pistons chu 111-99 in an hneh, tun regular season kal laiah vawi 38 ngawt hnehna an chang ta, chak hnem ber an ni.

Jayson Tatum-a'n point 34 a neih bakah rebound vawi 11 a la a, assist vawi ruk a nei bawk. Season hmasa khan Tatum hian ropui takin a team a lo chet pui tawh a, mahse an champion zo lo, kuminah hian NBA champion thei khawpin a puitling tawh em tih fiah a ni ang.