Odisha tan beisei a la bo lo

Thawhṭanni zan khan Indian Super League inkhelah Odisha leh FC Goa chu 1-1 in an inhnehtawk a, club pahnih tan ISL playoff khelh beiseina a la awm zel - match thum ve ve chiah khelh tur an nei tawh!

FC Goa hian minute hnihna lekah Noah Sadaoui hmangin goal hmahruai an khung a, Odisha tan hna hautak an tuksak nghal. Mahse, mualneitu team hian Diego Mauricio hmangin minute 43-naah an chhanglet a, hun tawp thlengin goal dang a lut lo.

Minute 67-naah Odisha left back Sahil Panwar chu a yellow card pahnihna a hmuh avangin hnawhchhuah a ni a, Goa-in a tam zawk nih an chhawr theih chuan loh avangin point khatah lungawi an zir.

Odisha tan Isak Vanlalruatfela chuan inkhel bul ṭanin, Chennaiyin laka hero of the match-a thlan forward hi a khel ṭha hle - si phurh sutna goal hi a freekick hlawhchhuah aṭanga lut a ni.

Thingsulthliah tlangval hi minute 60-naah Jerry Mawihmingthanga chuan a thlak a, khelmual a awm chhungin Isak hi Goa tan a hnawk tluan chhuak zak - a chance neih vawi hnih a khung lohte chu a ui vawng vawng ang.

Odisha tan hian defender Lalruatthara chu bench aṭangin a lut bawk a, Goa lamah Ayush Dev Chhetri chuan bul ṭanin, minute 76-naah lakchhuah a ni thung - a vawi khat nana ISL season hmangtu Ayush hi a season hmasa bera league match 17 an khelh tawhah a inlan vek!

Zanin ISL-ah inkhel pakhat a awm dawn a, beisei tur nei tawh lo NorthEast United chuan khualmualah East Bengal an lenchilh dawn - Kolkata club tan erawh playoff khelh theih dan a la awm a, thilmak a thlen erawh a ngai ang.

East Bengal-ah hian match 15 khel tawh Jerry Lalrinzuala leh match 15 vek khel tawh Lalchungnunga ten hmun pawimawh an chang a, defender ve ve an ni.

NorthEast United-ah hian forward Rochharzela (14 matches), defender Joe Zoherliana (10), midfielder Emanuel Lalchhanchhuaha (9) leh forward R. Laldanmawia (3) te chu Mizoram player awm mek an ni bawk.